Ямр нег эмчд күрхин кергт өдгә цагт интернетар дамжад бичгдж болжана

Ямр нег эмчд күрхин кергт өдгә цагт интернетар дамжад бичгдж болжана. Хальмг танһчин эрүл-мендин халхд шин зәнгллһнә систет оруллһна көдлмш эклсн бәәнә. Күн болһна гемин туск цуг тоод цутхлнг электронн эв-арһд хадһлгдхмн. Эн төсв танһчин цуг эрүл-мендин учрежденьст орулгдх зөвтә.

Өдр болһн балһсна поликлиникин бәәрнд чеерүдт суух олн улсиг үзж болхмн. Эмчд орхин кергт әмтн регистратурт бичгдәд талон эс гиж амбулаторн цаасан авхин кергт дала цаг геенә. Энүнә хөөн кесг частан чеерүдт сууцхана. Иим йовдл жиләс жил болһн үзж болхмн.

Мана үүдәгч баг әмтнлә харһад эн төрәр күндв. Цаган гееһәд, чеерүдт суух болжанавидн. Кезәэн йовдл чикрхнь медгджәхш гиж эдн келцхәнә.

Шишлнг информационн систем бәәдл-жирлһд оруллһн-гемтә улсин, эмчнрин цагин эрүн олзлх арһ өгхмн-гиж танһчин эрүл-менд харлһна министр Владимир Шовунов келнә. Эмчд орхин кергт өдгә цагт регистратурт бичгдж картан хәәх керг уга.эмчин компьютерт ирсн күүнә эрүд-мендин тускар, лабораторн шинжлтин тускар цугинь олж болхмн. Иим йовдл әмтнә кесг зовлнг гиигрүлхмн гиж министр тоолжана.

Хамгин түрүнд шин эв-арһиг бачм дөнг күргдг әнгин специалистнр көдлмштән орулхар белджәнә. ГЛОНАСС гидг системин дөнгәр эндр өдр церглтин диспетчер бачм дөнг күрглһнә машин альд йовхинь медж чаджана. Эн йовдл ямр нег зеткр учрсн цагт дарунь күрәд, цаглань дөнг болх арһ өгхмн. Энүнә тускар»Бачм дөнг күрглһнә» станцин ах эмч Николай Гучинов цәәлһж келв.

Удл уга им систем танһчин хөрн йисн медицинск учрежденьд орулгдхмн. Энүнәс иштә эрүл-менд харлһна министерствин һардачнр цуг медицинск көдләчнрин үлдвриг юүрткж хәләһәд, олн-әмтнд дөнг күрглһнә чинринь йилһж чадхмн. Энүнәснань интернет портал көдлхмн. Тегәд интернетар дамжад ямаран чигн эмчд бичгдж болхмн.

Эн эв-арһ олн-әмтнә төлә кегджәх юмн болжана гиж Элст балһсна эрүл-менд харлһна заллтын һардач Руслан Нагаев келнә.

Иим шин төсв мана орн-нутгин зәрм регионмудар өдгә цагт үүлджәнә. Шин систем чеерүдиг баһрулсн деерән, сән чинртә эмнлһ күргх арһ өгчәнә гиж келх кергтә.

Гольдина Ирина, Хавтхан Анатолий