«Вести Кабардино-Балкария» компаня журналист Казбек Геккиевиг алсна туск һундлта зәнг ирв
Эндр Нальчик балһснас һундлта зәнг ирсн бәәнә. Эн зурцд «Вести Кабардино-Балкария» компаня журналист Казбек Геккиев мана хальмг танһчд телевидень тогтсна 45 жилин өөнлә мана коллективиг йөрәжәнә. Бидн журналистнр дангинд хоорндан үүрләд, нег өрк-бүл мет ни-негн бәәнәвидн. Харм төрхд өцкүлдүр асхн Казбек Геккиевиг алсна туск һундлта зәнг ирв. Мана зәрм журналистнр Казбекиг сән меддг бәәсмн, көдлмшин халхар бәәж-бәәжәһәд залһлда бәрж үүлддг билә. Эднә келсәр Казбек цаһан седклтә, көдлмштән һол оньган өгч үүлддг дамшлта баһ наста журналист бәәсмн. Эврә сүл шуд эфиран Казбек Геккиев өцкүлдүр асхн арвн долан час дөчн минутла давулсмн. Шинкән хөрн нәәм нас зүүсн баахн күн бәәсмн. Хальмг танһчин телерадиокомпаня коллектив һундл төрж өөрхн улсиннь зовлнг хувалцжана.
Әрәсән хотл Москва балһснас Кабардино-Балкарүр дамшлтта криминалистнр йовулгдсн бәәнә. Кабардино-Балкарин журналистнин зәнглсәр Казбек Геккиев Ар Кавказин һазрт террористнрла ноолда келһнә туск репортаж белддго бәәсмн. Мөшкәчнр болхла эн йовдлл журналистин профессиональн керг-үүлдврлә залһлдата гиж тоолжана.
