Вольн янзар бөк бәрлдлһнә марһан болв

Вольн янзар бөк бәрлдлһнә цугәрәсән марһанд Хальмгин бөкнр долан алтн, йисн цаһан мөнгн медаль шүүж авв. Дөрлдән арвн чиннүрин категорьт болв. Энүнд Ставрополин, Дагестана, Волгоградын, Краснодарск крайин болн хальмг танһчин зу һар уйн наста бөк чидлән сөрв.

Марһана түрүн ноолданас авн бөкнр цуг арһ чидлән агсж, диилвр бәрхәр дөрлдв. Диилвр бәсрн спортсменмүд мөрәһәр ачлгдсн деерән, чемпиона нер зүүх зөвтә билә. Дамшлтта тренермуд Алдр Бадмаевиг темдгләд, иргчдән сән бөк болж өсх гиж нәәлжәнә. Ода Алдр таһчин нер олн-зүсн марһаст орлцад харсна. Эн саамд тренермудыг иткүлиг ханһаһад призермудын тоод орв.

Алдр Бадмаевин келсәр, марһанд тохнята белдвр кеж. Тегәд чигн диилвр бәрж чадв.

Эн дөрлдәнд Хальмг танһчин Октябрьск района бөкнр сән үзмж бәрж чадсн уга. Коля Чириков Махачкала балһсна спортсменд диилгдв. Энүнә келсәр, ода эн дөрлдәнә хөөн эврәннь эндүәһән чикләд сән белдвр кех кергтә. Хамгин түрүн техникан ясж авх төр тәвгджәнә. Йисн наста Осман Настаев болхла дегд үүмәд, бас сән күцәмж бәрж чадсн уга. Эн көвүн урднь чигн олн-зүсн дөрлдәнд орлцв. Тер бийнь ода деерән дамшлт хоршах кергтә. Блиц Коля Чириковин келсәр, эн саамд шав авад, сән үзмж бәрж чадсн уга.

Дагестана элч Магомед Багавдинов ноолдана түрүн минутд эврәннь дассн эв-арһ олзлад, диилвр бәрж чадв. Аштнь эврәннь чиннүртән цуг ноолдан диилвр бәрәд, алтн медаль шүүж авв.

Магомед Багавдиновин келсәр, түрүн болж Хальмгт ирсн цагт диилвр бәрж чадсн уга. Ода болхла сән белдвр кеһәд, диилвр бәрж чадв.

Дөрлдәнд тогтсн авьясар хамгин сән бөкнр ирж орлцв. Марһана ах зарһч Эрнцн Авлаевин келсәр, хальмг танһчин бөкнр долан алтн, йисн цаһан мөнгн медальмуд шүүж авв. Иим сән үзмж хальмгин бөкнрин эрдм болн дамшлт өөдлжәх темдг болжана. Ода олн көвүд вольн янзар бөк бәрлдлһнд дуран өгәд, цогц-махмудан батрулж, эрүл-дорул кевәр бәәлһнә авьясар бәәнә.

Эрнцн Авлаевин темдглсәр, Өмн үзгин цуг регаионмудас хамгин әсн бөкнр ирв. ут-тоодан зу һар спортсмен дөрлдв. Эн кемд талдан дөрлдән болснас көлтә эн марһанд дала күн ирж орлцж чадсн уга.

Иим марһан бичкн бөкнрт дамшлт хоршах арһ өгсн деерән, бичкн көвүд таладн региона спортсменмүдлә таньлдад, залһлда бәрхд сән нилчән күргжәнә. Эднә келсәр, дөрлдәнд ноолддг бийнь, бәәдл-жирһлд эдн нәәжнр болжана. Дөрлдәнә дииләчнр болхла дарани шүүвр күләжәнә. Эдн Өмн үзгин федеральн округин марһанд чидлән сөрх.

Ээнән Ольга, Хулхачин Николай