Багшнрин марһан болв
“Эрдмтә багш”. Иим нерәдлһтә эврә дурар үүлддг эрдмчнрин фестиваль болв. Энүнд хальмг келәр гертән соньн кегдлмүд талдан келн-улсин багшнр белдж авч ирв. Келхд, иим керг-үүлдвр хотл балһснд хойрдад бүрдәж давулгджана. Энүнд орлцх улсин то жил ирвәс өсәд йовна.
Хөрн жилдән школд көдлжәх багш Елена Киевская иим марһанд түрүн болж орлцжана. Орс келнә багш талдан көдләчнрлә хамдан хальмг би белдж. Элстин арвн доладгч тойгта школын коллектив фестивальд бүкл сардан тохнята белдвр кеж. Ду, шүлгүд, йөрәл дасж авла. Багшин келсәр невчк күнд болжа бәәв, тер бийнь даалһвран күцәж чадв.
Элстин арвн доладгч тойгта школын орс келнә болн литературин багш Елена Киевская келсәр, иим керг-үүлдврмүд олн келн-улсиг негдүлнә, талдан келн-улсла ни-негн бәәхд сән нилчән күргнә. Мана танһчд кесг келн-улсин элчнр бәәнә. Иим марһан келн-улсин хәрлцә батрулна.
“Эрдмтә багш” нертә фестиваль хойрдгч тойгта школд болв. Биологин, эсвин, физкультурин болн талдан чигн предметүдин багшнр сцен деер йоста артистнрлә әдл бийән бәрв. Элст балһсна администрацин олна хүүвин гешүд фестивалиг хальмг улсин Чичрдг бииһәр эклв. Иим марһанд талдан келн-улсин багшнр орлцснь ончта йовдл болв.
Арвн доладгч школын информатикин багш Мурат-Али Манкаевин келсәр, эврән ногай келн-улсин элч. Эднә келнә айлһ тас талдан. Тер бийнь әдл ә бәәнә. Тегәд хальмг келәр келхд энүнд невчк амр болв. Жюрин темдглсәр, келн әдл болж медгдв.
Хотл балһсна школмудын, лицеймудын болн гимназьмудын багшнр хальмг улсин амн үгин зөөр үзлсн деерән театрализованн наад жюрин оньгт тусхав. Энүнд хальмг улсиг цаажла харһулсн төр бас орв. Залд олар цуглрсн багшнр болн талдан чигн көдләчнр эврәннб командан дөннв. Эднә келсәр иим фестиваль йоста ик байрт хүврв. Элстин хойрдгч тойгт ашколд иим керг-үүлдвр дару-дарунь болна. Хойр минһн доладгч жиләс авн энд хальмг келәр багшнр, сурһульчнр болн эк-эцкнрин дунд олн-зүсн марһас болна. Эн саамд Екатерина Ефимова хальмгу лсин кезнк яс кемәлһнә авьяс үзүлв.
Ода хотл балһсна хойрдгч школд цуг келн-улсин сурһульчнр хальмг кел дасжана.
Элстин хойрдгч тойгта школын биологин багш Наталия Филоненко келсәр, эн школын сурһульчнр хальмг кел меднә. Тавдгч класст сурчах энүнә ач көвүнь хальмг келәр күүндж чадна. Хойрдгч класст оржах зе күүкнь хальмг шүлгүд, үлгүр, тууль дасжана. Бичкдүдт хальмг келн соньн болна. школын багшнр сәәнәр кел дасхна.
Хальмг кел сергәж босхж авлһна төр талдан келн-улсин элчнриг бас үүмүлжәхнь эн фестиваль ил медүлв. Иим марһан жил болһн бүрдәгдәд, сән зангшалд тохрхнь лавта.
Баира Петрова, Хавтхна Анатолий
