Виктор Дорджиевин һәәхүл секгдв

Пальмовин нертә келн-улсин музейд Хальмгин ачта зурач, урн һарин эрдмч Виктор Дорджиевин өөнин һәәхүл секгдв. Өвәрц билгтә болн күч-көлсч күн дүрслгч искусствд эврә орман эзлж чадв.

Виктор Дорджиевин һәәхүлд зун көдлмш тәвгдв, тер тоод "Вестник весны", "Далн хойр худл", "Корабль пустыни" нертә үүдәврмүд үзж болх. Урн һарин эрдмч эврәннь кегдлмүдән хамгин сән зангшалын янзар кеж һарһна. Зурач яснас келн-улсин янзар бүкл шатрин хуранһу үүдәж. Шин комплект болһн урдкаснь йилһрнә. Тер мет һәәхүлд эрдмчин чолунас кесн түрүн кегдлмүд үзж болх.

Хальмг танһчин ачта зурач Виктор Дорджиевин келсәр, шатр энүнд ик чинр зүүжәнә. Эн нааднд дурта. ик кезәнәс авн хальмгин шатрт хатн нертә бод уга бәәсмн. Энүнә үүдәсн шатрт хатн бәәнә. Күүкд улс мана бәәдл-жирһлд ик чинр зүүнә.

Эврәннь көдлмштән эрдмч мамонтын, занын, моржин яс болн кашалотын шүд олзлж көдлнә. Зурачин үүдәсн “Делкән Цаһан Аав”, “Жомба”, “Зая-Пандита”, “Шкатулка” кегдлмүд йир ке-сәәхн болсн деерән художественн болн материальн үнтә зөөр болжана.

Келн-улсин музейин көдләч Виктория Убушаеван келсәр, иим һәәхүл мана танһчд йир ховр болсн деерән өвәрц. Иим урн һарин эрдмч бәәснь йир сән керг. Яснас иим нәрн кегдлмүд кедг күн ховр. Тегәд иим эрдмиг шинәс сергәж босхж авх кергтә.

“Резных узоров мастер” нертә һәәхүлд ирсн улс Виктор Дорджиевиг жирн жилин ончта өөнләнь өрәв, тер тоод танһчин эрдмчнр, зурачнр, эннүә элгн-саднь болн өөрхн улснь бүлән үгмүдән зурачд нерәдв.

Зурачин әвәрц билг-эрдм эгл тоотыг тас талддан халхас үзхд туслна. Виктор Дорджиевин көдлмш Әрәсән Өмн үзгин һәәхүлмүдт болн цугәрәсән марһаст орцла.

Ээнән Делгр, Хулхачин Николай