Санлын поезд Ханты-Мансийск балһснд һарч йовв
Давсн бембә өдр Хальмг танһчас һарч йовсн санлын поезд Ханты-Мансийск автономн округд күрх. Тенд Хальмгин делегац хальмгудыг цаажла харһулсн далдгч жилин һашута өөнин керг-үүлдврт орлцх, Сиврт әмнәсн хаһцсн улст нерәдгдсн гегәрлтин суврһна секлһнд орлцх. Тер мет санлын поездар йовсн улс тууврт бәәсн һазрт одхмн.
Санлын поезд һарч йовхин өмн цаажла харһад әмнәсн хаһцсн улсинс анлд нерәдгдсн митинг болв. Энүнд орлцачнр “Исход и возврашение” бумбд цецгүд тәвцхәв. Элстин цутхлнг хурлын гелнгүд маань умшад, хол һазрт йовжах улст цаһан хаалһ дурдв. Санлын поездар йовжах улс бичкн цагтан бәәсн һазртан одх, эк-эцкнь бәәсн һазрт күрх, гегәрлтин суврһн секлһнд орлцх. Келхд, Сиврт хальмгин делегац дөрвдәд һарч йовжана. Түрүн санлын поезд йирн дөрвдгч жилд һарч йовсмн. Тиигхд танһчин һурвн зун күн Тюмень, Омск, Барнаул, Томск, Красноярск, Новосибирск балһсдт күрәд, киитн һазрт үлдсн улсин санлынь тодлв.
Танһчин правительствин ахлач Игорь Зотовин келсәр, санлын поездар һарч йовжах улс тенд үлдсн элгн-садан тодлх. Тер мет Сиврт хальмгудт нөкд болсн улст хальмгуд ханлтан өргж чадх. Иим йовдл дәкж бичгә учртха.
Элст балһсна бәәрн күн Сергей Мучиряевин нүднәс нульмсн заядар асхрв. Зурһан настадан эврәннь өрк-бүлтәһән Сиврт нүүлһсмн. Хол күнд хаалһд учсрн йовдлмуд ода күртл санлас һархш. Өрүн эрт салдснр эдниг серүләд, товарн вагонд суулһв. Дәкнәс күзүцә зовлн дааһад һарсн һазрт одхд амр болшго гиж Мучиряев тоолжана.
Найн наста Боова Жаваеван келсәр, насн дииләд ирв чигн, баһ дуувр насндан бәәсн һазрт ода Сиврин нәәжнрлә харһад күүндәд, тер һашута цагин тускар тодлврмударн хувалцх саната. Бичкн цагтан Сиврт бәсн әмтн ода медәрәд ирв. Тер бийнь һашута цагин ода күртл сәәнәр тодлна. Тенд шишлнг шажна авьяс күцәхәр медәтнр зул авч һарв.
Ханты-Мансийск келн-улсин округ хөөннь автономн округд хүврүлгдв. Нааран зурһан минһн хальмгудыг нүүлһсн билә. Эдн нурһлж цаажин өмн Хальмгин заһс бәрлһнә эдл-ахәусд көдлжәсмн. Ханты-Мансийск окрүгд хальмгудыг Березовск, Микояновсск, Сургутск, Кондинск, Самаровск, Ларьякск райодт болн Нижневартовск балһснд тараж бәәршлүлв. Югра аһуд хөрн минһн ахьмгуд бәәсмн. Санлын поездин хальмгин делегацин ханьд зун күн һарч йовв. Эдниг Хальмгин олн-әмтнә хуралд танһчин толһачин элч Виталий Дагинов һарджана. Виталий Дагинов тер һашута цагшин утскар эврәннь эк-эцкнин келснәс медж авв.
Олн-әмтнә хуралд танһчин толһачин элч Виталий Дагиновин келсәр, эврәннь эк-эцкин, ээж-аавасн Сиврт бәәснә тускар меднә. Тенд мана өвкнр дааж һарсн золвнг мадна өвдкүр болжана.
Хальмгин делегац Ханты-Мансийск балһснла өөрхн таньлдх, келн-улсин иньглтин асхнд орлцх, шатрин марһанд дөрлдх, Хальмгин болн Югран искусствин эрдмчнрин ик концерт хәләх. Тер мет санлын поездын орлцачнр гегәрлтин суврһн байрин бәәдлд секлһнд орцлхмн. Тенд үлдсн өөрхн улсиннь үкәрт одад, зул өргәд, санлынь тодлх. Хальмг улс цаажла харад, күзүцә золвн дааһад һарв чигн, эврәннь сойлан, төрскн келән геелго, хадһлад ирв.
Ээнән Ольга, Хулхачин Николай
