Урн һарта сурһульчнлин марһан болв

Эн долан хонгт танһчин бичкдүдин үүдәлтин бәәшнгд урн һарта бичкдүдин кегдлмүдин марһан болв. Энүнд көвүд-күүкд кермсин, самолетмудын болн танкмудын модельмуд үзүлв. Сурһульчнрт болн эднә багшнрт соньн кегдлмүдин марһан йоста хәләвр болв.

Марһанд орлцхин төлә көвүд-күүкд ик көдлмш кев. Эднә кегдлмүдиг чанһ некрвтә жюри хәләж шинжлв. Иим кегдлмүд кехин төлә урн һар, медрл болн зөрмг кергтә болв. Өдгә цагт техническ конструированьд баһ оньг тусхагдна. Иим эрдмәр сурхин төлә сурһульчнрт таал уга болжана. Ода бичкдүд сул цагтан нурһлж компьютерин ард сууна. Тер саамд конструкторин эрдм урдк кевәр кергтә эрдм болжана. Тегәд дорас өсж йовх баһчудт номин болн техническ халхар гүн медрл өгч, иим эрдмд дуран өгх сурһмж өгхлә сән болх.

Хальмгин университетин инженерн-техническ факультетин кафедрин һардач Болот Турдуматовин келсәр, эн жил дамшлтын чинртә олн көдлмш марһанд орлцв. Иим кегдлмүдиг эндәс авч одад, сервист углж тәвж болх. Иим эрдм бичкдүдт иргчдән олз-туста болх. Жирһлин хаалһан шүүж авхд дөн болхнь лавта.

Марһанд Целинн, Яшкульск, Яшалтинск, Октябрьск райодын болн Элтс балһсна школмудын сурһульчнр орлцв. Уйн наста техникүд дөрвн номинацар хөрн төсв үзүлв. Эднә көдлмш йир күнд гиж жюрин гешүд темдглв. Жил ирвәс сурһульчнри төсв техническ халхар жанһрта болн соньн болна. Энүг бәәдл-жирһлд чигн олзлж болв. Сурһульчнр иим өвәрц көдлмш кеснд багшнрин ик тәвц бәәнә.

Жуковин нертә Троицк гимназин йисдгч классин сурһульч Армен Хачикян келсәр, Миг-29 төсвин зургудыг интернетд үзж. Тегәд иим самолет кех санан орв. Мана багш болн һардач Владимир Ильичд ик ханлт өргжәнә. Энүнә дөн угаһар иим самолет кеж чадшго бәәж. Энүнә нилчәр дала медрл авч чадв.

Марһанд күүкд орлцснь өвәрц болсн деерән, жюри зөвәр алнг болад бәәв. Юнгад гихлә техникар нурһлж көвүд соньмсна. Анастасия Тетерина болхла иигж санжахш. Эн күүкн машина моторин түләнә систем цеврлһнә эв-арһ кеж һарһв.

Яшалтинск района бичкдүдин үүдәлтин герин сурһульч Анастасия Тетерина келсәр, хойр жилдән иим кружокд оржана. Машина моторин түләнә систем цеврлдг эв-арһ кеж. Машидын техническ станцд одшгон төләд, иим эв-арһар гертән мотор цеврлж болх. Иим эв-арһ гертән кеж болна.

Бичкн көвүд-күүкд номин болн техническ үүдәлтәр оданас авн соньмсжахнь сән керг болжана. Иргчдән уйн наста техникүдин һарар болн медрләр күмн әмтнә девшлтиг уралан йовулх төсв кегдх нәәлвр бәәнә.

Елена Алексенко, Хавтхна Анатолий, Колдан Церн