Баһчудын ик хург Элстд болв

Элст балһснд оютнрин педагогическ отрядмудын форум көдлмшән төгсәв. Дәкәд нег тодлад келхлә, баһчудын ик хург апрелин һурвнас авн долан күртл болв. Энүнд Әрәсән оютнрин отрядмудын баһчудын организацсин шунмһа орлцачнр көдлв.

Дөрвн хонгин эргцд форумин орлцачнр олн зүсн төрмүдәр күүндвр кеж, ирлцнһү шиидврмүд батлж авв. Тер тоод оютнрнин педагогическ отрядмудын үүлдвр бүрдәлһнә, кадрмуд белдлһнә болн жавлин туск төрмүд хаһлв. Баһчудын ик хургт орлцсн улсин тоолврар, форумин йовудт эдн үүдәлтин болн сойлын дамшлт хоршаж чадв, олн нәәжнрлһәһән харһад күүндв, шин нәәжнр олж авв, сергмжтәһәр амрв. Эн күүнә тоолврар, хотл балһснд келн-улсин янз ил үзгднә. Балһсн йир икәр таасгдв. Өвәрц гермүд дорд үзгин янзар кегдж. Энүнә темдглсәр, талдан һазрас ирсн баһчудла таньлдад, нәәжнрән олж авв. Көдлмштә олзлх дамшлт хоршаж авх арһ учрв.

Форумин программин керг-үүлдврмүд дегд олн болв. Тегәд чигн хург сән ашта болв. Баһчудын ик хургин йовудт олн-зүсн үүлдврмүдин төрмүдәр күр-күүндвр кегдв, мастер-классмуд болв, кесг марһас бүрдәж давулгдв. Хальмгин государственн университет шунмһа бүрдәһәчнрин тоод орв. Әрәсән бичкдүдин немр эрдм-сурһулин, сурһмжин болн баһчудын политикин департаментин директор Александр Страдзе форумин көдлмшиг өөдәнәр үнлж, мана танһчд вожатск жисән сән кевәр бүрдәгджәнә гиж темдглв. Әрәсән бичкдүдин немр эрдм-сурһулин, сурһмжин болн баһчудын политикин департаментин директор Александр Страдзе келсәр, университет танһчд ик чинртә сурһулин заведень болж һарчана. Энд сурһулин керг йир сәәнәр кегджәнә. Көдлмш энд чикәр кегджәнә. Хальмгин деед сурһуль оютнрин негдлтин төлә федеральн дөнцл мөнг авсмн. Тегәд чигн оютнрин жисән энд делгрлт авчана.

Форумин йовудт баһчуд чидл хоршаж, шин ухан-сана тодлж авад, гер талан хәрв. Удл уга бичкдүдин зунын амрлһна кем эклх. Форумин ашар хоршаж авсн дамшлт вожатмудт зунын көдлмшт сән нилчән күргхнь лавта.

Елена Алексенко, Котина Валерий