“Теегин айс” марһан удл уга болх
Февралин нег шинд хальмг дууна бичкдүдин телевизионн “Теегин айс” нертә марһан эклх. Энүг “Калмыкия” ГТРК болн Элст балһсна эрдм-сурһулин заллт бүрдәж давулх. Бүрдәһәчнрин келсәр, бичкдүдин үүдәлтин делгрлтин, дууна билгтә көвүд-күүкдиг йилһж авлһна, хальмг дуунд дуран өглһнә, төрскн кел бичкдүдт даслһна төлә иим марһан бүрдәгджәнә.
“Теегин айс” нертә марһан мана танһчд һурвн жил дарандан бүрдәж давулгджана. Бичкдүдин дууһин телевизионн марһана һол күцлнь — келн-улсин оюни зангшал сергәж босхлһн, уйн наста билгтнриг йилһж авлһн, төрскн келнд бичкдүд дуран өглһн болжана. Нег сарин эргцд Элст балһсна цуг школмудын билгтнр телеэфирт эврәннь дурта дууһан дуулж өгх. Дииләчнр хойр номинацар — онц дуулһна болн вокальн коллективмуд дунд дөрлдән болх.
Элст балһсна эрдм-сурһулин заллтин ах специалист Булһн Ангирован келсәр, хотл балһсна телевизионн марһан тогтсн авьясар хойр номинацар болх. Эннь түрүн багд хамгин бичкн дуучнр — негдгч-тавгдгч классммудын сурһульчнр дөрлдх, хойрдгч багд зурһадгч — арвн негдгч классмудын көвүд-күүкд марһанд орлцх.
Бүрдәһәчнрин келсәр, марһана хойр девснгин ашт дөрлдәнә лауреатмуд медгдх. Тер тоод интернетар дамжулад дууһан өглһн тоод авгдх. Хотл балһсна школ болһн эврәннь дуучнран дөннхин төлә шишлнг багмуд тогтаж чадх. Эдн бас көгжмин номер белдж чаджана. Марһана йовудыг бичкдүдин үүдәлтин бәәшнгд олн хәләһәчнр орлцата цокж авх.
Марһана бүрдәмжин комитетин гешүн Тамара Надбитован келсәр, давсн жилмдүин марһасин лауреатмуд болн дипломантнр эн жилин дөрлдәнд орлцж чадшго.
Телевизионн марһана дииләчнр болн призермуд дипломар болн шишлнг мөрәһәр ачлгдх. Дәкәд нег тодлад келхлә, давсн жилд этношколын сурһульч Ангира Чунгуева танһчин толһачин мөрә — нарта-делкән бичкдүдин зунын лагерьт амрх сертификат шүүж авсн билә. Гран-при мөрәһәр болхла хойрдгч тойгта Элст балһсна дундын школын сурһульч Церн Ховаев ачлгдв. Эн көвүн нарта-делкән дурта һазрт амрх путевк авв.
Композитор Аркадий Манджиевин һардврта шишлнг жюри уйн наста билгтнриг үнлх. Товчлгч гала-концерт Элст балһснд мартын хөрн нәәмнд болх. Телерадиокомпаня бүрдәсн хәләһәчнрин мөрә интернетын эв-арһар дууһан өглһнә хөөн бәрүлж өггдх.
Бевина Мергн, Ирчин Алексей
