Олн давхрта гермүдт капитальн ясвр кегдх
Олн давхрта гермүдин олна зөөрин эдлвриг ясрулһна, әмтнә бәәцин таал ясрулһна болн әәмшг уга бәәлһнә бәәдл тетклһнә төрмүд халһгдх. Эннь хойр минһн дөчн һурвдгч жил күртл олн патьрта гермүдт капитальн ясвр келһнә программар күцәгдх зөвтә. Эн жил күртл нег минһн герт кергтә ясвр күцәгдх зөвтә.
ЖКХ-н халхар кегджәхсольвриг олн улс үүмәтәһәр тосна. Хотл балһсна улс шинкн нег сольврт ижлдхлә, талдан сольвр орулгдна. Эн саам бас зүткәтә сольвр орулх шиидвр авгдв. Давсн жилин чилгчәр олн давхрта гермүдт капитальн ясвр кех программ батлж авгдла. Хойр минһн арвн дөрвдгч жиләс авн олн патьрта гермүдт капитальн ясвр кехин төлә региональн санг бүрдәгдв. Энүнә дөнгәр цуг төрмүд хаһлх саната. Одд гермүдин эздүд сар болһн нег дөрвлжн метрин төлә тавн арслнг хөрн деншг капитальн ясврт орулж өгх зөвтә.
Кемр тадн һучн һурвн дөрвлжн метрт нег хората патьрт бәәхлә, сар болһн зун далн негн арслнг жирн деншг орулж өгх зөвтәт. Хойр хората патьрин эзн хойр зун арвн нәәмн арлснг дөнч деншг өгх зөвтә, жирн дөрвлжн метр аһута һурвн хората патьрин эздүд һурвн зун арвн хойр арслнг өгх кергтә.
Олн патьрта гермүдт капитальн ясвр келһнә региональн сангин генеральн директор Владимир Очировин келсәр, ясвр кехин төлә эн жил федеральн бюджетас арвн тавн дундур сай ирх, танһчин хазн нәәмн сай нәәмн зун минһн арслнг йилһж өгчәнә.
Шин закаһар эн мөнгиг эн жилин июлин нег шинәс авх зөвтә. Шин программ барлсна хөөн зурһан сар болхла гермүдин эздүд капитальн ясврин төлә эрк биш мөнгән өгх зөвтә. Энүнә тускар ода зәрм әмтн меджәх Эн закан Әрәсән Федерацин жилишн кодесла ирлцжәнә. Олн патьрта гермүдт капитальн ясвр кехин келһнә региональн программ йосн кевәр барлсна хөөн дөрвн сарин эргцд аптьрмудын эздүд мөнг орулж өглһнә эв-арһ шүүж авх зөвтә. Иим шиидвр эн жилин май сарин нег шин күртл авх закан һарв.
Түрүн эв-арһнь — олн патьрта гермүдт капитальн ясвр келһнә шишлнг счетд мөнг орулж болх. Эн эв-арһар гермүди эздүд эврән мөнгән хоршаһад, ясвр келһюнә төрмүдиг эврән хаһлж чадх. Тер тоод ямаран ясвр кехин тускар, ямаран тосхлтын организац шүүж авхин тускар, ясврин көдлмшиг эврән бүрткх зөвтә. Хойрдгч эв-арһар капитальн ясврин санг региональн оператор тогтах зөвтә. Эн эв-арһар оператор эврән ясврин көдлмш цаглань күцәх даалһврта, энүнә чинринь бүрткж хәләх зөвтә.
Хальмгин ЖКХ-н министр Нелли Ткачеван келсәр, Свр кех гермүдиг шүүж авхла, кезә эн гер тосхгдснь, сүл дәкж кезә капитальн ясвр кегдснь тоод авгдв.
Капитальн ясврин йовудт герин оар шинрүлж ясгдх зөвтә, герт бәәх цуг оборудовань шинрүлгдх, лифтмуд сольх зөвтә. Цуг төрмүдәр әмтн региональн сангиг офист одад эрлһ орулж өгч чадх. Энүнә хайгинь болн телефона З-45-82 тойгинь тадн эврәннь экрандан үзжәнәт. Шин программин тускар ТСЖ-н болн ЖСК-н ахлачнрла министр Нелли Ткачева эврән селвлцә кех зурата. Эн жил капитальн ясвр кех олн давхрта гермдүин то йилһж авгдв. Эн жил райодт болн Элст балһснд һучн тавн герт ясвр кегдх. Эднә зәрмнь Ленина , Городовиковин, Гагарина нертә улуьнцд болн негдгч микрорайонд бәәнә. Келхд, негдгч микрорайона тавн давхрта гермүд жирн дөрвдгч жилд тосхгдсмн.
Негдгч микрорайона тавдгч герин бәәрн күүкд күн Людмила Бачаеван келсәр, эн герт жирн дөрвдгч жилсә авн бәәнә. Герин подьездиг ирж хәләтн. Дегд му дүрстә. Сүл дәкж далн дөврдгч жил ясвр энд кесн билә. Тер цагас авн капитальн ясвр кегдәд уга. Зуг цааснд ясвр кегдв гиж бичв.
Элст балһсна улсин тоолврар, иим ясвр кезәнә кех зөвтә бәәсмн. Эн халхар шин программ сән ничлән күргх гиж эдн нәәлжәнә.
Батан Санжирма, Хавтхна Анатолий, Эрнжәнә Эрднь
