Сүл жилмүд хуучн, нуурад унжах гермүдт бәәх улсин төлә кесг дөннлһнә государственн программ көдлжәнә

Сүл жилмүд хуучн, нуурад унжах гермүдт бәәх улсин төлә кесг дөннлһнә государственн программ көдлжәнә. Нег программин таал иим; олн жилдән хуучн герт бәәх улст дөн болж ясвр кегднә. Эн жил Целинн районд 5 олн патьрта герт ясвр кегдгдх, эн туст 5 сай арслнг йилһгдж өггдх. Тавн сай арслнгас һурвнь Әрәсән программин нилч болжана, үлдснь Хальмг Танһчин бюджетас болн селәнә муниципальн бүрдәц даах. Давсн 2011 жилд хөрн хойр герт ясвр кегдв, эн керг үүлдврт 22 сай арслнг йилһгдв.

Троицкое селәнә бәәрн күүкд күн Роза Шурганова Пушкина нертә үүльнцд 21 тойгта герт олн жилдән өрк бүләрн бәәнә. Давсн жилин чилгчәр эн герин ораһинь сольгдв. Һурвн сар давв чигн шин ората гер болв чигн урк кевәрн гер доткр бәәх эрсмүд чиигтә. Эн герин ораһинь ясвр кесн көдләчнр мууһар кев, эндр өдр эн герин ора заагта. Үвлин киитн цагла цасн хур орна. Хур-чиг орсна хөөн эрсмүд көгжрнә.

Эн герт бәәх улс ясврин көдлмшиг тенкән уга күләсмн. Болв чик кевәрн ясвр кегдсн уга. Ода күртл бидн дуту дундснь эврәннь һарарн күцәжәнәвидн. Хур чик орсна хөөн эрсмүдин көгжрхнд олн зүсн хорна һарч ирнә.

Эн күүкд күүнә бичсн эрлһәр Троицкое селәнә ахлач эн герин ораһинь хәләхәр ирв. Орж ирснә хөөн герин ораднь цасн кевстнь Троицкое селәнә ахлач эврә нүдәрн үзв. Ахр цагин бозлгт эн герин ораһин шинәс ясхгдх кергтә — гиж Троицкое селәнә ахлач келв. Сүл хойр жил хооран Троицкое селәнд 22 герт ясврин көдлмш кегдсн билә, ут тоодан эн кепрг үүлдврт 24 сай арслнг йилһгдв.

Эн жилд эн программар 5 гермүд капитальн ясврт орх, эн туст эднд 5 сай арлснг йилһгдж өггдх. Бәәрн селәнә муниципаньн бүрдәцд мөнгн уга болв чигн эн көдлдмшиг Танһчин бюджетн мөнгнәс ясв кегдх.

Тодлад келхд, давсн жилин хаврин кемлә хуучн нуурад унжах гермүдт бәәх улсиг нүүлһнә программар эндр өдр эдлврт 2 гер орулггдв. Троицкое селәнә ахлач Андрей Дорджиевин келсәр эн туст нег 1 квадратн метр 15 минһн йисн зун арслгн күртчәнә. Хальмг Танһчд болхла нег квадратн метр 18 минһн хойр зун арслнгд күрнә.

Энүнә ашт кимдәр авсн тосхлтын материалмудас кегдн ясврин көдлмш эндр өдр әмтнд таасгджахш. Эн тускар әмтн дурго болад кесг эрлһ бичнә.

Болв үвл ирәд эднә гермүд йир дулан болв гиж маднд Людмила Харцхаева келв. Кимд тосхлтын материал болв чигн үвлин киитн өдрмүдт бидн даарсн угавидн.

Эндр өдр хуучн гермүдәс нүүхәр ЗЗ тойгта герин бәәрн улс күләжәнә. Ясврин көдлмш эднә герт 60 жилмүдәс кегдсн уга билә. Ирина Мурченко эн герт төрхәрә цагасн авн бәәнә. Кезә эн хуучн гертәс бидн нүүхвидн — гиж мадн эн күүд күн зөвлнган келж өгв. Мини герин эзн болн күүкд эн цагиг тенкән уга күләжәнә. Энд өдр бәәх гер йир хуучн, гер дотрк эрсмүд нуурад унжана.

Троицкое селәнә ахла Андрей Дорджиевин келсәр декабрь сар күртл мана селәнд хойр шин гер тосхгдх. Эн туст 7 сай арлнг мөнгн йилһгдж өггдх. 5 сай арлнг федеральн бюджетас, 2 сай арслн мана селәнә муниципальн бүрдәц даах.

Зубцова Татьяна, Хулхачин Николай