Шүүвр бүртклһнә олна комиссин сүүр болв
Хальмг танһчин аһуд ЕГЭ-н шүүвр бүртклһнә олан комиссин сүүр болв. Энүнд сурһульчнрин государственн шүүврин аш диглгдв. Келхд, иим олна комиссь мана танһчд түрүн болж көдлжәнә. Энүнә үүлдврин ашнь сән. Иргч жилд бас иим комиссь тогтах селвг орулж өггдв.
Танһчин эрдм-сурһулин министрин дарук эврәннь докладтан келсәр, эн жил шүүвр арвн һурвн предметар өггдв. Эднәс орс келнә болн эсвин предметмудар шүүврин эрк биш өгх кергтә. Ирина Кавкишеван келсәр, эсвин предметар шүүврин үзмж сән болв. Энүнә келсәр, найн негнәс авн зун балл күртл авсн сурһульчнрин то Әрәсән кемжәнәс ик болв. Орс келнә предметар болхла давсн жиллә дүнцүлхлә, дунд балл баһ болв. Тер бийнь өөднә балл авсн көдлмшин то Әрәсән кемжәнәс бас ик болв. Эн жил хамгин бичкн балл авсн улсин то баһрв, тегәд чигн дунд сурһулин аттестат эс авсн баһчудын то баһрж. Министрин дарук цуг шүүврин аш диглв. Өөдән балл авсн көдлмшиг дәкнәс бүрткж хәләх көдлмшин утскар келхлә, федеральн комиссьт һурвн предметар иим көдлмш йовулгдв. Эднәс дөрвн көдлмш орс келнә предметар, эсвин хөрн көдлмш болн туужин предметар арвн тавн көдлмш йовулв.
Министрин дарук Ирина Кавкишеван келсәр, ЕГЭ-н шүүврин ашт иим өөдән балл авсна учрнь тавн чинртә. сүл цагт сән гүн медрл авхин төлә цуг таал бәәнә. Тер мет государственн шүүврт сәәнәр белдж болжана. Ода сурһульчн ик эртәснь ямаран күнд даалһвр күцәхинь медәд, белдвр кежәнә.
Тер мет ЕГЭ-н шүүврин йовудт зака эвдсн йовдлмудын тускар докладчик келв. Энүнә тускар Рособрнадзор зәнглсн билә. Тер тоод бүртклһнә материалмудыг интернетд олж авх арһ урсмн. иим йовдл Баһ Дөрвдә, Яшкульск, Приютненск райодт учрв. Государственн шүүврин комиссин шиидврәр эн сурһвльчнрин ЕГЭ-н шүүврин аш тоод авгдсн уга. Сүүрт зүткәнә болн предметн комиссин тооцан кегдв. Эрдм-сурһулин министр Лариса Васильеван келсәр, танһчин толһач Алексей Орловин даалһврар, олна комиссь бүрдәгдв.
Эрдм-сурһулин министр Лариса Васильеван келсәр, шүүврин компань цуг улст ик чинртә болна. Шүүврин тускар эк-эцкнр болн олан комиссь кергтә цәәлһвр авла.
Олна комиссин һардач Михаил Ткачев шүүврин ашар тооца кев. Олна комиссин һардач Михаил Ткачевин келсәр, комиссин бүртксн шүүврин йовудт зака эвдсн йовдл учрсн уга. Олна комиссь тогталһн сән керг болв, сән нилчән күргв. Эн жилин комиссин нерн деерәс иргч жилд бас иим комиссь бүрдәх селвг орулж өгчәнә. Комиссин гешүдиг шинрүлх кергтә иим көдлмшиг жил болһн кехлә сән болх.
Сүүрт орулж өгсн селвгүдиг хургт орлцсн цуг улс дөннв.
Чучян Валентина, Бадмаран Владислав
