Игорь Зотов Сарпинск районд одв
Хальмг танһчин толһач Игорь Зотов Сарпинск районд көдлмшин кергәр одв. Эн саамд бичкдүдин садмудт, школмудт болн хаалһсин ясврин көдлмшәр Игорь Зотов соньмсад, һол оньган тусхав. Эн төрмүдәр танһчин толһач Алексей Орлов района һардачнрт даалһвр өгсн билә. Энүнә тускар танһчин правительствин ахлач дәкәд нег тодлж келв.
Садовое селәнә бичкдүдин садд шинрүлж яслһна хөөн сентябрин нег шинд у-сарул хораст, көгжмин классмудт болн спортивн залд хойр зун хөрн көвүн-күүкн орж чадх. Садын негдгч корпуст һурвн жил хооран капитальн ясвр кегдсн билә. Ода болхла канализацин систем, усна сурвлжн, дула өглһнә систем сольгдх, шин пол делггдх, шин терз-үүдн хойрдгч корпуст углж тәвгдхмн. Энүнә төлә күсдундур сай арслнг йилһж өөгдв. Тер мет сурһулин шин жилин эклц күртл Сарпинск районд талдан чигн дошкольн учрежденьст шинрүлж яслһна көдлмш кегдх. Тер мет района зәрм селәдт урднь бәәсн бичкдүдин садмудын гермүд муниципалитетин медлд хәрү өггдв. Тегәд чигн бичкдүдин садмудт чеерүд уга болх.
Сарпинск района администрацин толһач Юрий Жуковин келсәр, Степной селәнд дәкәд нег садын герт автономн дула өглһнә систем көдлх.
Дәкәд болхла Алексей Орловин өгсн даалһврар, Кировский поселкд усна дамб шинрүлж яслһна көдлмш эклв. Энүнд усна боодг батрулһна көдлмш сүл хөрн жилд кегдәд уга бәәж. Эн цагин эргцд дамб хуучрад, му бәәдлд тусв. Ода энүнәс көлтә усна боодгин өөр бәәх улст ик әәмшг учражана. Нег үлү, Һоожур селәг залһжах ор һанцхн хаалһ энд давж һарчана.
Тер мет Игорь Зотов Обильненск дундын школд кегджәх ясврин көдлмш бүрткв. Энүг далн йисдсг жилд эдлврт орулсмн. Тер цагас авн капитальн ясвр кегдәд уга бәәж. Ода школын герин ора сольгдх, терз-үүдн шинрүлгдх, спортзалд ясвр кегдх.
Тер мет школд дула өгчәх автономс системин эвдрсн хәәсн сольгдх. Сүл жилмүдт Сарпинск районд уудн усар тетклһнә төр хурц төрт хүврв. Ода энүг хаһлх төр хаһлгджана. Северный нертә усна булг шинрүлж ясхин төлә һурвн сай арслнг йилһж өггджәнә.
Танһчин правительствин ахлач Игорь Зотовин келсәр, энд кех көдлмш дала. Энүг ахр болзгт сән чинртәһәр күцәх кергтә. Садовое селәнә улсиг усар тетклһнә төр бас хаһлх кергтә. Эн төр ахр цагт хаһлж болшго. Эн жил экләд күцәсн керг, иргчдән кех көдлмшин ул болх. Өөрхн иргчд Садовое селәнә улсиг уудг усар тетклһнә төр күцц хаһлх зура бәәнә.
Сарпинск РМО-н администрацин толһач Юрий Жуковин келсәр, дөнцл мөнгн сән нилчән күргх. Сүл арвн жилд уудг усна төр хаһлхин төлә мөнгн йилһж өггдсн уга. Садовое селәнд усна булг бурһудхин төлә һурвн сай арслнг олзлгдх. Тер мет ик мөнгн бичкдүдин садмуд, школ, хаалһс яслһнд йовулгдх. Эн мөнгәр Уманцево селәнд көлгн-күчнә халхар тетклһнә төр хаһлгдв. Ода энүнә төлә “ГАЗель” автобус авх бооцан батлж авгджана.
Ода районд социальн цуг халхар ирлцнһү көдлмш күцәгджәнә. Энүг чанһ бүртклһнд авсна хөөн, көдлмш завср угаһар кегджәнә.
Хавтхна Элла, Мятежный Максим
