Школьн медаль өгхмб аль угай?

Школын медаль — дунд сурһулиг йилһән сәәнәр сурсн көвүд-күүкдт бәрүлж өггднә. Сүл цагт иим медальмудыг өгдгинь уурулхин тускар зүткәтә күүндвр һарчана. Хойр минһн йисдгч жиләс авн деед сурһульд орсн цагт медалистнрин льгот өггджәхш. Ода деед сурһульд абитуриентнр оржах кемд эн төрәр зүткән царандан болжана.

Элина Манджиевад сурһулян йилһән сәәнәр сурх төр зарчмин керг болжана. Хойрдгч классас авн күүкн зуг тавн темдгәр сурчана. Олн-зүсн олимпиадмудт, марһаст болн үүдәгч керг-үүлдврмүдт орлцна. Тер бийнь эрк биш школын хөөн медаль авх күцл өмнән тәвсн уга. Деед сурһульд орсн кемд медалистнрт льгот өггдх зөвтә гиж Элина тоолжана.

Элст балһсна олн халхта гимназин арвн негдгч классин сурһульч Элина Манджиеван келсәр, невчкн балл немх кергтә билә. Талдан көвүд-күүкдт бас медаль авхин төлә балл немх кергтә. Арвн жилдән сурһулян йилһән сәәнәр сурв. Дәкәд нег жил үлдв. Ода улм сәәнәр сурһулян сурх кергтә. Цуг предметар тавн темдг авх саната.

Кесг жилдән тогтсн авьясар школан йилһән сәәнәр төгсәсн сурһульчнрт медаль өгхмн аль угай? Ода иим сурвр баһчудыг икәр үүмлжәнә. Школд сурсн сүл хойр жилд сурһульчин ашлгч темгдүд зуг цугтан тавн болхла, алтн медаль өгдг бәәсмн. Зуг тавн темдгәр сурхд амр биш. Школын хөөн медаль авхар олн сурһульчнр ухалжана.

Школан алтн медаляр төгсәсн Аня Мухонько келсәр, медаль авхар негдгч классас авн ухалв. Суруһлян сәәнәр сурхла, багшнр буульна. талдан сурһульчнрас йилһнә. Сүл хойр жилд арвдгч класс болн арвн негдчг класст күнд болна. Медаль авхин төлә цуг предметар сәәнәр сурх кергтә, шүүврт белдх кергтә. Сән балл авад деед сурһульд орх күцл тәвж.

Элст балһсна олн халхта гимназин директор Клим Насунов школын хамгин сән сурһульчнрин төлә медаль өгхин туск тоолвран медүлв. Школд кесг жилдән көдләд байн дамшлт хоршав. Энүнә толврар, школын хөөн алтн медаль авхин төлә зуг тавн темдгәр сурснь баһ.

Энүн деер немр сурһуль сурад, гүн медрл авх кергтә, олн-зүсн олимпиадмудт, марһаст орлцх кергтә, школын бәәдл-жирһлд бас шунмһа кевәр орлцх кергтә болжана. Элст балһсна олн халхта гимназин директор Клим Насуновин келсәр, медальмуд кергтә. Алтн болн цаһан мөнгн медаль өгх кергтә. Сурһулян йилһән сәәнәр сурдуг көвүд-күүкдиг зуг хоосн темдгәр биш, медальмудар ачлхла сән болх.

Школан йилһән сәәнәр төгсәсн сурһульчнр деед сурһульд орад, авсн медрлән иткүлж чадхш. Тегәд школмдт медаль өгдгинь уурулх кергтә гиж сүл цагт күүндвр һарчана. Эн туст школмудт болн үлмә уга комиссьмүдин көдлмшт диг-дара орулх кергтә. Школан төгсәжәх көвүд-күүкдиг чанһар бүрткәд, шүүврин кемд эднд багшнр дөн болх зөв уга. Сурһульднь темдгинь өөдлүлхмн биш, деед сурһулин болн ах классмудын программиг ирлцүлх төр тәвгджәнә.

Елена Алексенко, Очра Сергей