Казанск кафедральн чонжд бичкдүдин зунын лагерь секгдв

“Ноев ковчег” нертә зунын православн бичкдүдин лагерь Казанкс кафедральн чонжд секгдв. Амрлһна кемд көвүд-күүкд мөргүлд орлцсна, чонжин эргндк аһу цеврлһнә көдлмш күцәжәнә, музеймудт, театрмудт одна, халун өдрмүдт бассейнд өөмнә.

Эн өдриг көвүд-күүкд ик кезәнәс авн күләжәлә. Эдн ик урдаснь өөмлһнә хувц, махла белдж авч. Тегәд уснд өөмхләрн ик байрта бәәв. Эвелина кесг сардан өөмлһнә кружокт оржана. Эндр талдан көвүд-күүдлә хамдан уснд яһж чикәр бийән бәрхин тускар сурһуль дасв.

Эвелина келсәр, эндр бассейнд ирсндән ик байрта бәәнә. Урднь өөмж чаддго бәәж, ода дасж авв.

Лагерин хамгин бичкн көвүд-күүкд болхла бассейнд мячик олзлж өөмв. Эднд бассейнд өөмлһн ик байр үүдәв. Юнгад гихлә, эднә ик зунь түрүн болж иим бассейнд өөмжәнә. Энүнә келсәр, бассейнд өөмдг дасж авхар ирж. Бассейнд йир сән, бидн өөмәд, уснас һарх дурн күрхш гиж эн келнә.

Нәәжнр Маша болн Юля кесг жилдән православн лагерьт амрчана. Күүкдин келсәр, энд йир икәр таасгджана. Эдн чонжд болдг мөргүлд орлцна, шажна ду дуулна, һаза цевр аһарт һарад наадна. Эн өдрмүдт лагерль амрчах көвүд-күүкд өрк-бүлин, дурна сән өдрин байрт белдвр кежәнә. Эднд Петр болн Февроньян мөнкин дурна туужин тускар фильм үзүлв. Юлия Филаненко келсәр, эн лагерьт экскурсьт музейд одна, соньн амрлһн болжана.

Лагерин өдр өрүн мөргүләс эклнә. Бичкдүд православн лагерьт амрхдан дурта Матушка келнә. Энүнд эдн бүкл жилдән белдвр кенә, сурһулян сәәнәр дасхар шунна, эк-эцкин үг сонсна. Иим шажна лагерь секснь сән керг. Энүнд көвүд-күүкд олз-тустаһар амрна, шажна үүлдәчнрлә харһад күүнднә, иргч жирһлд кергтә дамшлт авна. Тер мет эдн хоорндан нәәж-үр болад, ни-негн бәәнә. Православн шажна авьясар бәәх зокал иим лагерин һолк үцл болжана гиж Матушка Марина келнә.

Воскресн школын һардач Марина Гришенко келсәр, көвүд-күүкд хамдан цуглрад, үүрлх. Хоорндан ни-негн бәәнә. Компьютерин ард суухин ормд, һаза наадад, үүрлснь деер болх. Энд бәәх көвдү-күүкд оюни жирһлд дасх зөвтә. Оюни халхар батрхла сән болх.

Удл уга лагерьт амрчах көвүд-күүкд Ставропольск крайд православн әрүн һазрт одх.

Ээнән Делгр, Колдан Церн