Шин автобусмуд әмтнд таасгджана

Элст балһснд тавн өдр олна көлгн-күчн йовжана. Хотл балһсна әмтн шин автобусмудыг таасжана. Ода гертәсн холд сурчах сурһульчнр шин көлгн-күчәр экләд йовжана. Сурһулин шин жил эклнәс авн автобусмудар олн улс йовдг болв. Ик автобусар бичкдүд школдан, секцд йовхла эк-эцкнр санамр бәәнә. ПАЗ маркта автобусин жолачнр дегд түргәр йовхш, иим көлгн-күчәр йовхд әәмшг уга болна. Энүнд мана үүдәгч баг ил герч болв.

Баина Кугультинова тавдгч класст сурчана. Эн жил күүкн бииһин кружокт орх саната. Ода Элст балһснд шин автобусмуд йовсн цагт школд күрхд невчк амр болв. СНХ Сурһульч Баина Кугультинован келсәр, Элстд шин автобус йовжахнь сән керг. Ода кружоктан амрар күрч чадх. Талдан чигн керг-үүлдврт одх арһ бәәнә, нәәжнртәһән харһж болх.Урднь маршруткар йовхд жанһрта болг билә.

Ода хотл балһсна хаалһд ПАЗ автобусмуд һарсна хөөн, сурһулин завдень күртл күрхд амр болв гиж талдан чигн сурһульчнр келнә. Блиц 1 эн күүкнә келсәр, шин Пазикүд хаалһд һарсн хөөн, сән болв. Орм дала, зогсх керг уга.

Бичкн маршрутн автобусмудт медәтә улст суухд болн йовхд жанһрта болна. Тегәд ик автобусмуд пенсионермудт таасгджана. Дәкәд болхла иим көлгн-күчәр льготн категорин улс өнгәр йовж чаджана.

Цөн өдр хооран Элстин хаалһд арвн ПАЗ маркта автобусмуд һарв. Өдр ирвәс энүгәр йовх улсин то өсәд йовна. Иим автобусмудт йовхд эвтә, әәмшг угаһар йовж болх, энүнд Глонасс систем болн тохографмуд бәәнә. Эднә жолачнр өрүн болһн хаалһд һархин өмн эмчин хәләврт орна. Автобусмуд темдглсн графикар йовжана. Сергей Михайличенко хөрн жилдән жолач болж көдлжәнә. Шин автобуст көдлхдән таасжана.

ПАЗ маркта автобуст тәвн долан күн йовж чадх. Ода эдн негдгч, тавдгч, зурһадгч, арвн доладгч, арвн йисдгч болн хөрн доладгч маршрутар әмт зөөжәнә. Элст балһснд шин олна көлгн-күчн көдлжәхнь хотл балһсна улст болн гиичнр йоста байрта йовдл болв.