Шатрин марһан төгсв

Элст балһснд көвүд-күүкд дунд танһчин шатрин марһан төгсв. Энүнд диилвр бәрсн шатрчнр Әрәсән Өмн үзгин федеральн округин чемпионатд мана танһчин нер харсх. Окрүгин марһан эн жилин ноябрь сард болх.

Арвн негн наста Айса Сангаджи-Горяева нег жил хооран шатр нааддг дасч авла. Эн ахр болзгин эргцд олн-зүсн марһсаст орлцад, призермудын тоод орв. Арвн нег наста шатрчнр дунд танһчин марһанд диилвр бәрж чадв.

Айса Сангаджи-Горяеван келсәр, шатр наадхдан йир дурта. Наадн йир соньн. Школд сурһуль дасхд шатр ик дөн болжана.

Хальмг танһчин хойр дам чемпион, бичкдүд дунд Әрәсән шатрин чемпионатын деед лигин призер Дунгар Колдаев Өмн үзгин федеральн округин марһанд хальмг танһчин нер харсх. Шатр нааддг эрдм нәәмн настадан дасч авв. Сурһульчин келсәр, шатр наадхд эцкнь сән нилчән күргв. Сул цагтан эдн дурта наадан наадна. Тегәд чигн ахр болзгт иим сән үзмж бәрж чадв.

Дунгар Колдаевин келсәр, шатр йир сән наадн, диилвр бәрхлә икәр байрлна. Мөрә болн ачлврмуд шүүж авхдан дурта.

Танһчин шатрин марһанд зун көвүн-күүкн дииләчән йилһв. Бичкдүдин келсәр, кезәнк наадн сурһульд асхд туслна, нег үлү эсвин предмет даслһнд сән нилчән күргнә. Ухалх эрдм дасхна, эврән шиидвр авхд туслна. Марһанд орлцсн бичкдүдин ик зунь шатрар профессиональн кевәр көдлх саната. Тегәд чигн нарта-делкән нертә шатрчнрин марһа хәләнә. Медрл авхдан дурта. Ачлврмуд бәрүлж өгхлә байрлнав гиж эн келнә. Энүнә келсәр, шатр эсвин предмет даслһнд дөн болна. Күүнд ямаран чигн цагт нөкд болх наадн болжана. Эн көвүнә тоолврар, шатр наадсн күн һурвн нүүдл өмнәс ухалх кергтә. Эсвин предметла залһлдата наадн.

Марһана ах зарһч Михаил Голося темдглсәр, сүл цагт бичкдүд шатрар баһар соньмсдг болв. Юнгад гихлә һардачнрин халхас эдниг дөннжәхш. Давсн жилд иим марһанд хойр зун көвүн-күүкн орлцсн болхла, эн жил эднә то зөвәр баһрв.

Танһчин шатрин академин бичкдүдин школын тренер-багш Михаил Голося келсәр, ода чигн белдвр кехд цаг бәәнә. Танһчин һол командын ханьд эс орсн шатрчнр бәәдл чиклх цаг ода чигн дала. Сентябрь сард ах классин сурһульчнрин дунд дәкәд дөрвн марһа бүрдәх зура бәәнә.

Ода зунын амрлһна кем эклсн бийнь, көвүд-күүкд дурта наадан мартжахш. Өдр болһн гилтә эдн дамшлтан өөдлүлнә. Өмн үзгин федеральн марһанд сән үзмж бәрхин төлә тохнята белдвр кех кергтә болжана.

Ээнән Делгр, Котина Валерий