Орсин театр шин сезоһан эклжәнә

Ода Әрәсәд жил болһн намрин кемд ахр болзгт дулан өдрмүд тогтдг билә. Ода үвлин өмн өргнд дулан өдрмүдиг олн әмтн күләжәнә. Элст балһснд болхла эн кемин нертә “Бабье лето” наадн үзүлгдх. Эндр драмин болн шог наадна орсин театр шин сезоһан Айвон Мэнчэллин бичсн шог наадар эклжәнә.

“Бабье лето” нертә наадн дурна чидлин туск наадн. Энүнд нааджах актермудла хамдан хәләһәчнрт уульх инәх чигн саам учрх. наад тәвсн театрин ах режиссер Владислав Константиновин келсәр, шин наадн сергмжтә болн жирһлд урмд өгдг үүдәвр болжана. Энүнә кесләр, иим пьес шүүж авснь бас учрта. Өдгә цагт иим наадн әмтнд кергтә.

Театрин белджәх шин наадн цуг халхаснь өвәрц болх зөвтә. Театрин һол артисткс Елена Судакова, Людмила Мансурова болн Елена Бицунова тас талдан халхаснь билг-эрдмән үзүлжәнә. Режиссер эднә билгин талдан халх олж авч. Константиновин келсәр, һурвн артистк бийән тас талдан халхас секв. Шин нааднд эдн эврәннь билгән, занган сольх кергтә болв.

Драмин болн шог наадна орсин театрин ах режиссер Владислав Константиновин келсәр, Елена Судакова Ида нертә күүкнә дүр үзүлжәнә. Келхд, Судакова хурц зангта улсиг наадхдан дурта. Шин нааднд болхла занган дарад, дурлхин төлә ишкдл кежәнә. Людмила Мансурова болхла йириндән ке-сәәхн дүрмүд үзүлхдән дурта артистк. Энүнд ор һанцхн күүнә туск зовлнгиг сәәнәр медүлв. Елена Бицунова бас сәәхн дүрмүд наадад дассн күн. Энүнд Дорис күүкнә дүр чик кеәвр үзүлв.

Күүкд күүнд дурлхин төлә залу күн кергтә. Ик өрк-бүлд ор һанцхн күүнә зволнгат дүриг театрин һол артист Виктор Хаптаханов нааджана. Иим дүр энүнд наадхд бас өвәрц болв.

Театрин ах режиссер Владислав Константиновин келсәр, шин нааднд ор һанцхарн үлдсн күүнә зовлнгин тускар сәәнәр келгджәнә. Күүнә бәәдл-жирһлд ор һанхцн харсжахнь — дурн болжана.

Шин нааадн театрин туужд болн артистнрин үүдәлтин хаалһд шин халх болхнь лавта. Эндр Элстин хәләһәчнр болн гиичнр энүг түрүн болж хәләж чадх. Эн наадар драмин болн шог наадна орсин театр шин сезоһан эклжәнә.

Хавтхна Элла, Мятежный Максим