Орсин театр хәләһәчнртән шин наад белджәнә
Шог наадна болн драмин орсин театрт Василий Сигаревин бичсн “Детектор лжи” нертә наад үзүлхәр белджәнә. Энүг танһчин хәләһәчнр мартын нег шинәс авн һурвн күртл хәләж чадх.
Илвтә үзүлвртә болн гипнозта иим йовдл әрәсән өрк-бүл болһнд учрх бәәсмн. Наадна зокьялчин учр-утхиг иим кевәр үзсн режиссер Владислав Константинов шин наадна тускар иигж келнә. Шог наадна болн драмин танһчин орсин театр иим өдгә цагин наад түрүн болж тәвжәнә. Актермудын тоолврар, баһ наста болн әрәсәд нер туурсн драматургин үүдәвриг сцен деер үзүлсн йовдл цагин жисә дахж тәвжәх наадн биш болжана. Шин наадн хамгин түрүнд эврәннь жанһрта үүлдврәрн соньн болна. Әрәсән болн хальмг танһчин ачта артист Александр Шегловин келсәр, шин нааднд наадхд күнд болв. Бидн цуг арһ-чидлән эрдмән олзлад көдлвидн.
“Детектор лжи” нааднд жалван альдаран тәвсән мартсн залу күүнә болн залуһан оньдин уурлдг күүкд күүнә тускар келгдсн деерән, энүнд цаарандан олн-зүсн өвәрц йовдлмуд учрна. Гипнотизер ирсн хөөн нааднд олн-үзсн йовдлмуд дару-дарунь болна. Энүнә йовудт залу күн болн энүнә гергнь тас талдан халхас бийән медүлнә. Түрүн авгтан хәләһәчнрт эннь инәдтә шогта болж медгдхш.
Наадна зокьялч һучн зурһан наста Василий Сигаревин тускар театральн үүлдәчнр нег мөслгч хәләцтә биш. Зәрмнь энүнә үүдәвриг дурлж хәләнә, талдан улс энүнә үүдәвриг таасжахш. Тер бийнь режиссер Владислав Константинов орсин театрин төлә эн соньн наад шүүж авсмн. Драматургин амр биш занг болн нааднд үзүлгджәх өвәрц дүрмүд режиссерин оньг авлв. Наадн ямаран болсн тускар зуг хәләһәчнр үнлж чадх гиж режиссер тоолжана. Шог наадна болн драмин танһчин орсин театрин художествен һардач Владислав Константиновин келсәр, наад хәләсн әмтн бийән чигн таняд бәәх. Талдан улс иим наад хәләх дурн уга болх. Эннь күн болһнд әдл биш.
Шин нааднд орсин театрин хойр хань орлцжана. Театрин дамшлтта артистнриг баһ наста актермуд сольж наадх. Тегәд наад хәләсн әмтн артистнрин хойр үйнриг хәләж үнлж чаджана. Наадна түрүн үзүлвр мартын нег шинд болх.
Татьяна Дмитриева, Бадмаран Владислав
