27 февраля 2013, 15:28
МЧС-ин көдләчнр шишлнг сурһуль кев
Эндр танһчин МЧС-ин көдләчнрин сурһуль болв. Музейин хойрдгч давхрт Алдр Диилвр нертә һәәхүлин залд түүмр шатжана гисн зәнг Пальмовин нертә келн-улсин музейин харулин көдләчәс МЧС-ин шишлнг залһлдана цутхлнг пультд ирв. Герт әмтн бәәнә гисн зәнг орж ирж. Тер дарунь Элст балһсна пожарн гарнизона шишлнг бригад йовулгдв. Энүнә ханьд тәвн көдләч болн нәәмн түүмр унтрадг техник йовулгдв. Негдгч тойгта түүмр унтрадг әнг түрүн болж ирәд, һал альд орсинь шинжлжәнә, әмтиг герәс һарһж авчана. Энүнә ашт найн дөрвлжн метр аһуд һал орв, тавн күн герәс һарһгдв. Һал орсн туск зәнг ирсн хөөн зурһан минут болад түүмр унтралһна көдлмш эклв. Хөрн дөрвн минут болад һал унтрагдв.
