Олн-әмтнә фронтын гешүд инвалид бичкдүдиг дөннжәнә
Декабрин нег шинд цуг нарта-делкәд инвалидмудын нарта-делкән өдр темдглнә. Эн өдр буйнч седклин концертмуд болх, инвалид улст оньг тусхахин төлә олн-зүсн керг-үүлдврмүд бүрдәж давулгдх. Олн-әмтнә цугәрәсән фронтын региональн штаб эн өдрмүдт инвалид бичкдүд бәәх өрк-бүлмүд золһжана.
Чедыровин өрк-бүлд тавн үрн өсжәнә. Ууһн көвүнь Салават арвн зурһан наста, бичкнәсн авн инвалид. Күн гемтә болв чигн, школд сурһуль дасжана, талдан күүкдлә наадна. Хамгин түрүн гемдән даргдхмн биш, тиихлә зуг зура күцх гиж Салават иткжәнә. Инвалид улсин нарта-делкән сән өдрин өмн өргнд Салаватын өрк-бүлд гиичд олн -әмтнә цугәрәсән фронтын региональн штабын гешүд болн олимпийск чемпион Алина Макаренко ирв.
Сурһульчин келсәр, нертә чсемпионк Алина Макаренкола таньлдх гиж санжасн уга бәәж. Энүнә тускар нертә спортсменкин аав Петр Чавычаловас медж авч. Салават иим харһлтд ик гидгәр байрлв.
Салават Чедыровин келсәр, урднь Алина Макаренкон тускар сонсв, танһчин болн Әрәсән нер харсжасн тускар меднә Зуг энүнлә таньлдх гиж ухалжасн уга.
Харһлт бүлән болн иньглтин бәәдлд давв. Ода Салават эрдм-сурһулин чинр үнлһнә цутднгд болн арвн доладгч школд сурчана. Ода йисдгч класст сурчана, хаврар шүүвр өгхәр белджәнә. Сурһулян сәәнәр сурна. Энүнә хамгин дурта предметнь — обшествознание болн физик. Харм төрхд, школд одхд энүнд күн болна. Нег жил хооран энүнә эрүл-менд муурв. Тас йовдган уурв. Энүнә эцк Арслнг көвүһән школд Элст балһснд эврән күргжәнә. Кемр энүнә бәәсн һазрт интернат бәәсн болхла невчк амр болх билә гиж Салават келнә. Тиигхлә эврәннь гертәс һарлго интернетын дөнгәр сурһулян дасх бәәсмн.
Салаватын эк Светлана Чедырован келсәр, ода киитрсн цагт эврән көвүһән школд күргх кергтә болна. Сурһуль дасх кергтә, багшнр школд авч иртн гиж келнә. Сурһуль дасх кергтәһинь эврән меджәнә. Ода йисдгч класс оржана, арвн негн класс төгсәх саната. Арвн доладгч школын багшнр болн директор энүнә төлә байрлна. Урднь эврән көләрн йовдг билә. Дуулхдан дурта.
Урднь Салават инвалид-бичкдүдин цутхлнг бүрдәсн олн-зүсн концертд орлцдг билә. Тегәд ирсн гиичнр көвүнә дурта ду дуулж өгхинь сурв.
Энүнә эк-эцкнь ода көдлмш уга бәәнә. Эзнә эдл-аху дөн болжана. Светлана эврәннь күүкдтәһән герән ахулна. Арслнг болхла өдр болһн бичкдүдән счадт болн школд күргнә. Энүнә хөөн малан асрж хәләнә. Ода Чедыровихна өрк-бүл күүнә гер нәәмәдлжәнә. Энд газ болн усн уга. Арвн һурвн жилдән бәәдг гер авхар чеерүдт зогсжана. Жирһлин зовлнгиг эдн хамдан дааж һарчана.
Эврә гертә болад, талдан улсла әдл бәәх гиж нәәлжәнә. Ода болхла бичкдүдин эрүл-менднь болн сурһуль ик чинр зүүжәнә. Өсхләрн Салават юрист эс гиж программист болх саната. Энүнә тускар гиичнрт келж өгв. Олн-әмтнә цугрәәсн фронтын регинальн шатыдн гешүд инвалидмудын өдрин өмн өргнд инвалид бичкдүд бәәх дәкәд арвн өрк-бүлд одх зурата.
Баира Петрова Хулхачин Николай
