Олн халхта государственн туслмж күргдг цутхлнг көдлжәнә
Государственн болн муниципальн туслмж күрдг олн халхта цутхлнг көдлмшән цаарандан күцәжәнә. Энүнә һол күцлнь — өөдән мергжлттә көдләчнрин дөнгәр болн электронн систем олзлж әмтнд сән чнртә олн халхта туслжм күрглһн болжана.
Бәәрн һазрасн темдглж бичлһнә тооһас һархар болн темдглж бичлһнә документ һарһж авхар Гойдыковихн нааран ирж. Саглр Викторовна келсәр, урднь нег справк авхин төлә кесг өдртән күләх кергтә билә. Ода болхла цутхлнг секснә хөөн, цуг көдлмш амрар кегднә, нег үлү ахр болзгт кергтә документан һарһж авч болх. Саглр Гойдыкован келсәр, ода паспортн столд чеерүдт зогсх керг уга. Эннь дегд амр болв.
Шин цутхлнгиг нег терзин көдлмшин таалар кеж. Эннь әмтнд эвтә болжана гиж Элст балһсна бәәрн күүкд күн Даяна Алексеева келнә. Цутхлнгд ирсн улс ахр болзгт болн сән таалд олн-зүсн төрмүдәр кергтә зәнг авч чаджана. Дәкәд болхла энд электронн эв-арһ көдлжәнә, көдлжәх йисн терзин өөр чеерүд цуглрхш. Эннь улсин цаг әрвлжәнә. Даяна Алексееван келсәр, цуг көдлмш ахр болзгт күцәгднә. Өрүн ирхлә, үд күртл цуг кергтә документ белн болна.
Олн халхта цутхлнг хойр сардан көдлжәнә. Эн цагин эргцд энд көдлжәх специалистнр әмтнд хойр минһн туслмж күргв, тер тоод государственн болн муниципальн туслжм күрглһнә төрмүдәр нег минһн күн кергтә цәәлһвр авв. Цутхлнгин директор Санж Хулхачиевин келсәр, хамгин олн әмтн баһ наста өрк-бүлмүдиг темдглж бичж авлһна, баһ тетквртә улст дөнцл мөнг өглһнә болн эздүдин гермүдт бәәх улст дөн күрглһнә төрмүдәр цәәлһвр авхар ирнә. Өдгә цагт автономн учрежденьд арвн зурһан өөдән мергжлттә көдләчнр көдлжәнә, эднәс аврнь әмтнд нөкд болжана.
Государственн болн муниципальн туслмж күргдг цутхлнгин директор Санж Хулхачиевин келсәр, батлж авсн цуг зөвшәләр ода деерән цуг туслмж әмтнд күрггджәхш. Одахн зөвшәл батлж авсн организацсла немр көдлмш кеж, тенд мана специалистнр дамшлт авх зөвтә. Үлгүрнь, одахн Росреестрал зөвшәл батлгдв. Удл уга тенд специалистнр дамшлт авх. Энүнә хөөн эн халхар туслмж күргж болх.
Эн жил государственн болн муниципальн туслмж күргдг цутхлнгуд Көтчнрә, Городовиковск болн Хар Һазра райодт секгдхмн. Хойр минһн арвн тавдгч жил күртл иим цутхлнгуд танһчин цуг арвн һурвн районд болн Элст балһснд дәкәд нег цутхлнг экләд көдлх.
Ээнән Делгр, Настан Сергей
