Нәрн шинж наадн сергәгджәнә

Нәрн шинж йоста тәәлвртә тууль, энүг наадхин төлә һарин эв болн цецн ухан кергтә. Хальмг келнә деглртин тускар ухалжах улс хальмг улсин кезәнк Нәрн шинж келн-улсин наад сергәхәр шиидв. Иим наадн зуг мана келн-улст бәәнә. Күн болһн энүг тәәлж чадшго. Тер бийнь соньн наадыг олн улс дунд тархах зура бәәнә. Энүнә төлә Сарпинск района Аршань-Зельмн селәнд марһан бүрдәгдв.

Хальмг улсин дурта Нәрн шинж наадна тууж ут болн байн. Иим наадыг улан залатнр ик кезәнәс авн наадж йовсмн. Туужин номтнрин келсәр, кезә болн кен иим наад бүрдәсн тускар күн медхш. Иим наадн мана келн-улсла өөрхн зангшалта болн бәәцин таалта талдан монһл яста болн түрк келн-улст уга. Кезәнә цагт нәрн шинж наад бөдүн улс болн бичкдүд дурлж наддг бәәсмн. Модн көшүрт нәәмн эс гиж арвн хойр билцг болһата. Эдниг хойр улта зәнгдәһәс сулдхж авх кергтә. Түрүн хәләцд даалһвр дегд күнд биш, зун энүг сулһдж авхин төлә һюарин эв болн цецн ухан кергтә.

Өдгә цагт нәрн шинж наадн мартгдв. Ода мана танһчд зуг Сарпинск района Аршань-Зельмн селәнд ик баһ уга эн соньн наадар соньмсж нааджана. Медәтнрин келсәр, жирн хойрдгч жилд педагогическ институтын оютнр экспедицин йовудт бәәрн көгшн күүнәс нәрн шинж наад яһж наадхин тускар медж авч. Бәәрн медәт эн наадна таалывг киитн Сиврт хадһлж төрскн һазртан авч ирсмн. Тер цагас авн хальмгудыг өрк-бүлмүдт нәрн шинж наадыг ик баһ уга дурлж наадна, школмудт марһас болна.

Хальмг улсин олн-зүсн наадд дунд нәрн шинж онц орм эзлдг билә. Хүр кехлә, иим наад худнр наддг бәәж, күргн эврәннь иргч элгн-саднлаһар таньлдхла бас нәрн шинж нааадг авьяс бәәнә. Кемр күргн нәрн шинжиг эс сулдхж авч чадхла, эннь ичнртә йовдл гиж тоолгддг бәәж.

Билцгиг зәнгдәһәс сулдхж авхин төлә ухалх кергтә бәәсмн. Зәрм әмтн энүг сулдхж авч чадхш. Тегәд чигн наадн олн улс дунд тааста бәәсмн. Уд луга хуучн наадн шинәс сергәж авгдад, олн улс энүг дурлж наадх гиж сангдна. Хальмгин уул авьяс хадһлсн деерән, ухани билг делгрүлхд иим наадн сән нилчән күргнә.

Нимгрә Валентина