Мобильн медицинск цутхлнг хол селәдт күрв
Поликлиник машин деер көдлжәнә. Иим мобильн медицинск комплекс танһчин хол селәд-поселкст одад, улсиг сән чинртә шинжлтд орулжана. Арвн зурһан специалист темдглсн зураһар хамгин хол селәдт одх. Энүнд шин медицинск оборудовань бәәнә. Энүнә дөнгәр гем илткж болна, ямаран эмнүлһ кехинь эмчнр келж өгчәнә.
Эннь йир сән керг гиж найн наста Аршан-Зельмн селәнә бәәрн медәт Наталья Мутулова байртаһар келнә. Өрәл часин эргцд күцц эмчин шинжлдт орж болх. Района больницд болхла ик чеерүд тогтна, шинжлтд орхин төлә һурвн өдр кергтә болна.
Пенсионерк Надежда Манжиеван келсәр, района цутхлнг селәнд күрх кергтә, көлгн-күчн кергтә, мөнгн һарна. Нег үлү, медәтнр иим хол хаалһд йовж чаджахш. Ода болхла эдн гертәсн холд һарч йовлго, дор ормдан эмчин шинжлтд орв. Иим арһ эднд машина медицинск комплекс өгв. Энүг төгә деер көдлдг поликлиник гиж нерәдж болх.
Сарпинск района цутхлнг больницин ах эмчин дарук Эльза Санджиеван келсәр, эмчин шинжлтд күн болһн ик баһ уга цугтан оржд чадв.
Энүнә төлә зуг медицинск полис болн паспорт үзүлх кергтә бәәсмн. Иим неквр өдгә цагин цуг эмнүлин учрежденьд кегднә. Болв хамгин һол кергнь — шинжлт өнгхр кегднә. Хамгин олн күн УЗИ аппаратын шинжлтд орхар дурлв, тер мет кесг әмтн клинико-диагностическ лабораторьт шинжлт кех дуран медүлв. Күүкд улс болхла маммолог болн гинекологин хәләврт орхар адһв. Нег өдрин эргцд специалистнр зун кү шинжлтд орулв. Эннь зуг нег селәнд күцсн көдлмш болжана.
Сарпинск района больницин ах эмчин дарук Эльза Санджиеван келсәр, эн жил мана танһчд бөдүн улсин диспансеризац эклв, тер тоод Сарпинск районд бас болжана. Зураһар энүнд нәәмн зун һучн негн күн орх зөвтә. Ода района блльницд цуг эмчнр бәәнә. Шин оборудовань углж тәвгдв. Сулда нертә медицинск цутхлнгин специалистнр ирәд, улсин эмчин шинжлтд орулхд сән дөн күргжәнә. Нег үлү, хол селәдт Аршань-Зельмн, Обильное, Шарнут болн Салын Тугтн селәтин әмтн эмчин хәләврт орж чадх. Мобильн комплексин шинжлтд һурвн зун тәвн күн орв.
Энүнә дару эмчнр Үстин районд одхмн. Төгә деер көдлдг поликлиник дөрвн сарин эргцд тавн районд одад ирв. Үстин район зурһадгчнь. Цуг үнтә медицинск техник шишлнг чемонданд углж тәвгдв. Машин бәәх сандл болн орн батар углж тәвгдж. Эмчнрин келсәр, машин йовхла техник хамрхш. Хол хаалһд һарч йовхин өмн цутхлнгин специалистнр селәнә администрацла телефоһар күүндәд, эдниг ирлт цугнь белн болх зөвтә гиж сурна. Машиг электрокүчнлә залһлдулх кергтә. Кемр электрокүчн уга болхла, машинд дизель-генератор бәәнә. Энүнә дөнгәр автономн электрокүчәр теткж болх. Танһчин райодт һарч йовхин өмн эмчнр цуг техникиг болн прибормудыг бийдән олзлж хәләв. Тер мет эврәннь эрүл-мендән шинжлж чадв. Иим шинжлтд цугтан орв, жолачас авн экләд санитарк күртл хәләврт орв. Жолач Владимир мобильн бригадт эмчнрт сән нөкд болжана. Кергтә аппаратур углж тәвнә, күн чемодан зөөж нөкд болна, иалдан чигн күнд көдлмш кенә.
“Сулда” нертә шишлнг медицинск дөн күргдг танһчин цутхлнгин һардачин дарук Бэлла Манджиеван келсәр, селәнә әмтн дегд икәр байрлжана. ик ханлт өргжәнә. Хол селәдт бәәх улс икәр байрлв. Района эмчнр одна, зуг иим шинжлт кеж болхш. Мобильн комплекст цуг эмчнр бәәнә. Медицинск шинжлтд баһчуд оржана, көгшүд бас эмчин хәләврт орх. Эдн кесг жилдән эмчд күрч чаджахш.
Медицинск церглтин автобуст күүнә эрүл-менд шинжлж хәләлһнә төлә цуг кергтә аппаратур болн оборудовань авч ирнә. Хамгин түрүнд энүнд эмч-специалистнр йовна, цуг шинжлт кедг оборудовань бәәнә, талдан чигн хәләвр кех аппаратмуд көдлнә. Эмчин шинжлтын ашнь тер дарунь барлгдад, селәнә улст һартнь бәрүлж өггднә.
Эмч неврлог Михаил Имеевин келсәр, танһчин райодт зурһан зун күүкд күн шинжлгдв. Эднәс йисн процентнь гем илткгдв. Иим улст цаарандан хәләвр кех цаас бичж өгчәнә. Элст балһснд онкодиспансерт шинжлт кех селвг өгнә. Шилд орсн ашинь барлад әмтнд һартнь бәрүлж өгчәнә.
Эндр өдрт зуг нег мобильн бригад көдлжәнә. Энүнә ханьд цутхлнгин арвн зурһан байн дамшлтта специалист көдлжәнә. Ода деерән мана танһчд ор һанцхн иим медицинск комплекс бәәнә. Танһчин һардачнр эднә то икдүлх төр тәвжәнә. Эднә тоолврар, әмтн ямаран чиогн хол селәнд бәәсн бийнь, сән чинртә медицинск туслжм авх зөвтә.
Чучян Валентина, Батан Санжрма, Ирчин Алексей
