Баһ Дөрвд районд һан халунас көлтә һарсн һару тоолгдв
Баһ Дөрвдә районд һан-халунас көлтә һарсн һару тоолж һарһв. Долан жил дарандан догшн халун болад, Баһ Дөрвдә район буудян урһц хураж авч чаджахш. Эн жил аюлас көлтә һучн зурһан дундур сай арслнг һару һарв. Мана үүдәчг баг района зәрм эдл-ахусд одад, дор ормднь тогтсн бәәдллә өөрхнь таньлдв.
“Плодовитое” СПК районд сән эдл-ахун тоод йовна. Энд шин техник, һазр эд-бод кедг шин эв-арһ олзлжана. Тенгрин бәәдл му болв чигн, эдл-аху оньдин орутаһар көдлнә. Тер бийнь долан жил дарандан болсн һан-халун эдл-ахун экономикд му нилчән күргв. Ода тәрәнә аһуд хог-бог өвстә хамдан урһсн буудяг хадж авчана. Эннь олна малд үвлдән хот болх. Тер бийнь буудчн эк белдж авх арһ учрв.
Баһ Дөрвдә района Плодовитое СПК-н ахлач Юрий Искам келсәр, эн жил хаврар тәрсн тәвн зун гектар буудян урһц болн һурвн зун намрин тәрән хагсад үрж одв. Буудян эк цуглулж авх тәрәнә аһу үлдәж. Хойр зун тәвн гектарас ичмәнә экн хураж авгдв. Догшн халунас көлтә арвн сай арслнг һару һарв. Талдан халхд нәәлжәнә. Мал өсклһнә халх делгрлт авчана. Олна малд үвлин хот белдж авчана. Буудян урһц эс һарсн аһуһас олна малд өвсн хадж авгджана.
“Маяк” СПК-д болхла күнд бәәдл тогтв. Эн жил энд хойр дундур сай арслнг һару һарв. Эн жилин хаврар тәрсн тавн зун гектар буудян аһу хагсад үрж одв. Банкас арвн зурһан сай арлснг өгья мөнг авснас көлтә, дәкж банк кредит өгчәхш.
Баһ Дөрвдә района “Маяк” СПК-н ахлач Николай Хечиевин келсәр, хаврин кемд хур-чиг орсн уга. Тегәд чигн урһц дегд му болв. Эн жил тәрәнә аһуд йир күнд бәәдл тогтв.
Июлин арвн тавнас авн районд һан-халунас көлтә бачм чинртә бәәдл зарлгдсн билә. Ут-тоодан районлд зурһан минһн гектарт тәрән шатад үрв. Зәрм эдл-ахус урһц хуралһна көдлмш кесн уга. Ут-тоодан районд аюлас көлтә һучн зурһан дундур сай арслнг һару һарв.
Баһ Дөрвдә района администрацин АПК-н делгрлтин әнгин ахлач Валерий Константиновин келсәр, МЧС-ин халхас һарсн һару данцагдх гиж нәәлжәнә. Арвн нәәмн сай асрлнг данцагдх зөвтә. Района далн долан эдл-аху болн фермер һан халунас көлтә ик һаруд унв. Энүнә тускар ирлцнһү документ селәнә эдл-ахун министерствд орулж өггдв. Ода һару данцалһна мөнг күләжәнә. Кезә ирхнь медгджәхш. Болв цаарандан көдлх кергтә. Намрин тәрәнд нәәмн минһн хойр зун жирн гектар һазр белдгдв.
Ода района эдл-ахус МЧС-ин халхас танһчин бюджетас данцалһна мөнгнд нәәлжәнә. Эн мөнгәр иргч жилин тәрәнд буудян эк хулдж авх кергтә. Энүнә тускар района администрац цуг кергтә документ танһчин селәнә эдл-аухн министерствд йовулв. Ода района эдл-ахус намрин тәрәнд белдвр кежәнә.
Елена Алексенко, Хавтхна Анатолий
