Маршрутн автобусмудын туслжмин чинр ясржахш

Үн өсв чигн, туслмжин чинр ясрсн уга. Иигж Элст балһсна улсин ик зунь тоолжана. Маршрутн автобусмудар йовлһна үн өсснә хөөн, маршруткд әәмшг угаһар йовж болх гиж элстихн күләжәлә. Маршртун автобусмудар йовлһан үн арвн хойр арслнгд өсснәс авн хойр сар болв. Эннь зуг ор һанцхн сольвр болв гиж пассажирмуд тоолжана. Туслжмин үн икдүлснә хөөн арһлачнр туслжмин чинриг яһад эс өөдлүлсмн?

Эн жилин апрелин хөрн тавнас авн балһсна маршрутн автобусмудт йовлһна үн арвн хойр арслнгд күрв. Тер бийнь туслжмин чинр өөдлсн уга. Маршрутн автобусмыдн көдлмш бәәрн улст болн таллдан машидын жолачнрт таасгджахш. Маршруткс дегд түргәр гүүлгнә, хаалһар йовлһан зокал эвднә, пассжирмудла жолачнр керлднә, автобусмудын залачнр маши залж йовад тәмк татна, телефоһар күүнднә. Дәкәд болхла эдн кергтә кемжәнәс дегд олн кү авч йовна. Эн күүнә темдглсәр, автобусмудар йовлһна үн өсв. Болв туслмжин чинр ясрсн уга, тер кевтән үлдв. Автобусмудын үн эдн эврәннь төлә икдүлв. Жолачнр ГЛОНАСС тәвжәхш, дегд түргәр гүүлгнә. Туслмжин чинр өөдлсн уга. Туслжмин чинр урдк кеәвр үлдв, тас юмн сольгдсн уга гиж эн келнә.

Эдләчнрин зөв харслһан церглтд көлгн-күчнә туслмжин чинрин тускар олн әмтн эрлһ орулж өгснәс иштә маршрутн такси бүрткж хәләгдв. Хальмг танһчин эдләчнрин зөв харслһна халхин федеральн церглтин заллтин ах спцеиалист Любовь Джупаеван келсәр, эдләчнрин зөв харслһна әнгд нәәмн күн эрлһ орулж өгв. Жолачнр дегд түргәр гүүлгнә, жолачнр керлднә, салонд бузр гиж нурһлж эдн келнә.

Болв хамгин һол төрнь — улсиг әәмшг угаһар зөөлһн болжана. Болв энүнә тускар маршрутн автобусмудын зәрм жолачнр мартсн бәәдлтә. Хаалһар йовлһна зокал эдн оньдин эвднә. Тер мет автобусмудын техническ бәәдлин тускар мартхмн биш. Маршрутн автобусмудыт йовлһна үн икдснь нег учрнь — маши хәләж эдлһнә һару икдв.

Танһчин ГИББД-н әнгин ахлач Санл Лиджиевин келсәр, ода мана танһчд июнин арвн доланас авн хөрн долан күртл “Автобус” нернтә саглулгч керг-үүлдвр күцәгджәнә. Энүнә йовудт улсиг әәмшг угаһар зөөлһнә төрт, жолачнриг көдлмшт орулһна, көлгн-күчнә бәәдл шинжлгдх. Тер мет бооцан угаһар әмт зөөжәх жолачнриг илткж авчанавидн. Эдн муниципалитетла бооца батлж авх зөвтә. Ода тавн зун арлһачнрас өрәлнь иим бооцан угаһар көдлжәнә.

Ода Элтс балһсна администрацла ирлцнһү бооца батлж авсн маршрутн автобусмсудын то ода көдлжәх машидас хойр холванд баһ болжана. Тегәд чигн ода хотл балһснд олна көлгн-күчнә халхар иим бәәдл тогтв. Тер мет көлгн-күчнә туслмжин чинрин тускар элстихн хотл балһсна администрацин шишлнг телефоһар зәнглжәнә. Эн жилин эклцәс авн әмт зөөдг арһлачнрла хойр бооцан уга кегдв. Энүнә учрнь — маршрутн автобусмудын жолачнр соктуһар маши залж йовсн бәәж.

Элст балһсна промышленностин, көлгн-күчнә болн залһлдана әнгин һардач Мацг Малыковин келсәр, Элст балһснд маршрутн автобусмуд залдг зөв авхин төлә марһан давулгдв. Маршрутн автобусмудын жолачнр хойр зун арвн хойр бооца батлж авв. Арвн арһлач лицензь уга болад көдлх арһ уга болв. Эдн марһанд орлцх кергтә цаас орулж өгсн уга.

Тарифн кемжән өслһиг болн жолачнрин сән көдлмшиг негдүлхд күнд болжана. Юнгад гихлә, тарифин кемжән бензина үнәс, машина ясврас, даатлһна мөнгнәс тогтна.

Маршрутн автобусин жолач Павел Лиджиевин келсәр, кемжәнәс олн әмт бидн нурһлж өрүн-асхнд авнавидн. Әмтн көдлмштән күрхәр адһна. Дегд түргәр эс йовхла эс гиж хаалһар йовлһан зәрм зокал эс эвдхлә мөнг олдг арһ уга гиж эн келнә.

Элст балһснд муниципальн автобусмуд уга болда ик зовлнг болжана. Тегәд чигн хотл балһсна мэрийд ирлцнһү әнг уга, бүртклһнә орган бас көдлжәхш. Тер бийнь Элст балһснд әмт зөөлһнә керг ясрх зөвтә. Эс гиж олна көлгн-күчнд диг-даран тогтшго.

Елена Алексенко, Хавтхна Анатолий