Көтчнрә районд урһа модна дәкәд нег питомник тосхгдв
Хальмг танһчд урһа модна дәкәд нег питомник тосхгдв. Эннь тавдгч питомник болжана. Энүг тосхсн учрнь иим. Ода мана танчһд тәрмр урһмлын материал күртжәхш. Урднь иим материал урһаж авхин төлә дав зуурин питомникүдт һарар мод услх кергтә бәәсмн. Тегәд чигн Ергенинск урһа модна эдл-аху талдан һазрас иим тәрм хулдж авчасмн. Ода эдн эврәннь питомникд тәрмр материал урһаж авчана. Энүнд дусалын эв-арһар услвр кегджәнә.
Көтчнр селәнә өөр бәәх урһмл модна питомникин аһу хөрн йисн гектар һазр эзлжәнә. Энүг урһахин төлә федеральн бюджетас дөрвн сай асрлнг мөнгн йилһж өггдв. Эн мөнгәр усна булг бурһудв, дусалин эв-арһар услвр кедг системин оборудовань хулдж авгдла, электрокүчнә залһлдан орулгдв. Урмл модна питомник күцц тосххин төлә нег минһн хойр зун кубическ метр усн ордг хоршулһна бассейн бәрх кергтә. Энүнә төлә урһа модна эдл-ахун федеральн агентств һурвн сай арслнг мөнг йилһж өгх зөвтә. Эн мөнгн эн жил ирх.
Тосхлт төгсхинь күләлго энд вяз мод суулһв. Хойр сарин эргцд суулһсн модн өндртән хөрн тавн сантиметрт өсв. Май болн июнь сармудт хур эс орсн бийнь, һучн градус болад һан-халун болсн бийнь модн сәәнәр урһжана. Специалистнрин келсәр, дусалин эв-арһар кедг услвр сән нилчән күргв. Энүг олзлхин төлә урһа мод тәрлһнә эв-арһ сольв. Иим таалд усна кемжән аһарин кемжәнлә ирлцх зөвтә. Урһа модыг килмжән өгч эс хәләхлә, догшн халун болсн цагт ямаран чигн сән чинртә модн хагсад үрж одна.
Ергенинский лесхозин директор Юрий Лиджиевин келсәр, вяз мод суулһсн деер, нег гектар һазрин аһуд боолжрһн тәргдв. Ода модна эк цуглулж авч, эдниг эд-бод кев. Иим моднла зерг талдан чигн модн, тер тоод туя, береза модан экн тәргдх. Эн модн мана селәдиг кеерүлх.
Урһа модна базисн питмникас кергтә кемжәнд болн олн-зүсн урһа модна материал авч болх. Ода иим урһа модн мана танһчд ховр болжана. Хальмг танһчин дорд үзгин райодт урһа модна питомникүдт нурһлж элс зогсадг шагшгудын тәрмр урһмл урһаж авгдна. Танһчин цутхлнг райодт Ергенинск салн аһуд урһа модна питомникүд уга. Тегәд кергтә тәрмр урһмлыг талдан регионмудас хулдж авх кергтә болна. Хам-хоша бәәх регионмудт хавр эрт эклнә.
Хальмг танһчин модна эдл-ахун заллтин ахлачин дарук Борис Хулхачиевин келсәр, Хальмг танһчд тенгрин бәәдлин таал дегд күнд, хур чиг баһар орна. Орсн чиг ахр болзгт хагсж одна. Тегәд чигн урһа модн болн шагшгуд удан урһжахш.
Урднь давсн зун жилин йирдгч жилмүдт мана танһчд арвн питомник бәәсмн. Энүнд тәвн сай тәрмр урһмл урһаж авдг билә. Ода зуг тавн питомник үлдв. Ода тәрм урһмл модн федеарльн автомобильн хаалһсин хажуд тәргдх. Иим модн сәәнәр урһна, тер мет ахр болзгт тархагдж урһна, һазрин чинриг ясрулна, халун салькнас харсна, теегт ке-сәәхн бәәдл тогтана, улст сән таал бүрдәнә. Урһа модна эдл-ахун делгрлтин танһчин шишлнг программар арвн минһн гектар һазр урһа модна сангд орулж өггдх. Тиигхлә федеральн мөнгәр мана танһчин аһуд урһа мод олар тәрж болх. Энүнә төлә танһчин бюджетас проектн-сметн көдлмш күцәхин төлә һурвн сай арслнг йилһж өггдх.
Ээнән Ольга, Ирчин Алексей
