Кыргызстанас ирсн бичкн шатрчнр марһанд орлцжана
Сити-чесст шатрин нарта-делкән марһан цаарандан болжана. Энүнд Кыргыстана Бишкек балһсна олимпийск көрнгин шатрин школын сурһульчнр бас орлцжана. Дәкәд нег тодлад келхлә, Хальмг танһчин шатрин федерацин үрвәр иим хол һазрас гиичнр ирсмн.
Кыргыстанас ирсн Ислам Омурбеков ода зуг тавн наста. тегәд марһана хамгин бичкн орлцач болжана. Иим дөрлдәнд сән үзмж бәрх гиж нәәлжәнә. Дөрлдәнд орлцжах көвүд-күүкдәс зәрмнь бас сән күцәмж бәрж чадв. Үлгүрнь, Артур Соломко одахн Шри-Ланка орн-нутгас ирв. Зурһан нас күрәд уга бичкдүд дунд тенд болсн шатрин Азин чемпионатын ашар күрл мөнгн медаль шүүж авч. Бичкн наста хальмгин шатрч Никита Болдырев болхла, дарани диилвр бәрәд, кергтә очко олзлв. Шатрин нарта-делкән марһана орлцач Артур Соломко келсәр, дурта наадан дөрвн настаһасн авн нааджана. Никита Болдыревин темдглсәр болхла, наадхд тенд күнд болв. Хөрн очко хоршав.
Хол һазрас ирсн бичкн шатрчнр дөрлдәнд орлцсн деерән, Хальмг танһчин көвүд-күүкдлә таньлдад, нәәжнрән олж авв. Эднә төлә хотл балһсар экскурсь кегдв. Бичкдүдин шатрин дөрлдәнә ах зарч Александр Абушиновин келсәр, мана тренермуд ирсн гиичнрлә дамшлтарн хувалцв. Тер мет шатрин эрдмәр лекцс умшв. Иим кевәр дамшлтарн хувалцхла, олз-туста болна.
Хальмг танһчин эрдм-сурһулин, сойлын болн номин министерствд болсн харһлтын йовудт Кыргыстанас ирсн гиичнр ухан-тоолврарн хувалцв. Эднә келсәр, хальмгин школмудт шатр дасхжах дамшлт йир соньн болв. Удл уга Кыргыстанд бас иим кеәвр бичкдүдт шатр нааддг эрдм дасхх зура бәәнә. Тренер Кыргыстана шатрин хамцу олимпийск командын орлцач Бактыгуль Тиленбаеван келсәр, ода Хальмгт олн улс шатр наадг дасчана. Киргизин көвдү-күүкд хальмгин шатрчнрла наадад, дамшлт хоршах.
Тренер Бактыгуль Тиленбаеван келсәр, хальмг танһчд иим дөрлдәнд орлцснь көвдү-күүкдт мартшго йовдл болх. Гертән ирчкәд, бичкдүд энүнә тускар эрк биш школдан келж өгх. Иргч жилд болхла Хальмг танһчин бичкг шатрчнр хол Кыргыстанд одад, бас марһанд орлцх.
Бевина Мергн, Ирчин Алексей
