Краснодарск крайд Әрәсән цуг әмтн арһ-чидләрн нөкд болжана
Краснодарск крайд ик зовлнгд туссн улст Әрәсән цуг әмтн арһ-чидләрн нөкд болжана. Хальмг танһчин улс бас энүнд эврә тәвцән орулжана. Давсн нарн өдр Әрәсән Президент Владимир Путин Кубаньд одад дор ормднь бәәрн улсла харһад күүндв, һардачнрда селвлцә кев. Келхд, мана орн — нутгин һардач аюл учрсн һазрт хойрдад оджана. Эн ирлһндән гер уга үлдсн, инвалид, саата күүкд улст дөн күрглһнә төрт Путин онц оньг тусхав. Тер мет данцалһна мөнг өглһнә төр селвлцәнд һол төр болв. Ода Хальмг танһчин әмтн мөнгнх тәвцән йовулжана, хувц-хурн болн хот хол цуглулж өгчәнә.
Кубаньд күнд бәәдлд туссн улст дөн болхин улсин то Хальмг танһчд өсәд йовна. Ода бичкн үртә экнр, оютнр, пенсионермуд болн талдан чигн улс хувц-хунр, талдан чигн кергтә тоот авч иржәнә. Хальмг танһчин толһачин админи страцин көдләчнр нег өдрә жавлан Краснодарск крайд йовулв. Олн әмтнә хуралд Хальмг танһчин толһачин элч Виталий Дагиновин келсәр, көдләч болһн иим буйнч седклин дөн болхар шиидв. Өдрә жалван цугтан йовулв. Түрү-зүдү улст дөн күргхин тускар цуһар меджәнә.
Кубаньд усна аюлд харһсн улст бөн крүгхин төлә хальмгин пошт болһнд одад мөнгнә тәвц кеж болх болн посылк йовулж болжана. Энүнд дулан хувц, һос башмг болн талдан чигн әмтнд кергтә предметмуд йовулж чадхит. Ода мөнгнә тәвцәс эс гиж посылкас комиссионн мөнгн авгдшго. Энүнә тускар танһчин поштын әнгсин һардвр зәнглв. Поштын директор Хонһр Мутьяновин келсәр, күн болһн поштд ирәд, посылк кеж чадх. тавн өдр болад посылк Кубаньд күрх. Комиссин мөнгн авгджахш. Мөнгн болхла һурвн-дөрвн частан күрнә. Хамгин удан гиснь нег өдр болад күрх зөвтә.
Тер мет ода һурвн процентин комиссионн мөнг Сбербанк авчахш. Краснодарск крайд усна аюлд түрсн улст Хальмг танһчин әмтн мөнг йовулсн цагт иим мөнгн хасгдж авгддг билә. Иим мөнг авшго шиидвриг Москва балһснд цутхлнг офист болсн селвцәнә йовудт батлж авв. Эндр өдрт хальмг танһчин улс ут-тоодан хойр сай үлү арслнг мөнгнә тәвцән кев. Банкин региональн әнгин ахлачин иткүлсәр, урднь әмтнәс авгдсн комиссионн мөнгн хәрү өггдхмн. Ут-турштан иим хөрн минһн арслнг авгдж. Энүг Улан Кирсин Хальмгин әнгин расчетн тойгт йовулхмн. Эн өдрмүдт Хальмгин харсачнр Краснадарск крайд бачм чинртә бәәдл тогтсн һазрт Нижнебаканск болн Крымск балһсдт көдлжәнә.
Дәкәд нег тодлад келхлә, шишлнг кевәр тогтагдсн мобильн багмуд Элст балһснас июлин доланд һарч йовла. Харсач Николай Эрендженовин келсәр, ода мана харсачнр гермүдин подвалмудас ус сорж авчана. Нег баг Крымскд көдлжәнә. Хойрдгч баг Нижнебаканская станицд бәәнә. Бәәрн һолд унсн машид һарһж авчана. Хальмг танһчас гуманитарн дөн ирсн билә. Ода тенд зөрн күн көдлжәнә, зурһан техник одв. Кубаньд көдлджәх улс цугтан тәрлһнд орв гиж Эрнедженов келнә.
Темдглсн зураһар цуг ясврин көдлмш давсн анарн өдр төгсх зөвтә билә. Ут-тоодан Әрәсәд ода зун дөчн дөрвн сай асрлнг дөн цуглулгдв.
Дмитрий Ивахненко, Очра Сергей
