Концертн залын гериг шинрүлж ясх кергтә

Танһчин хамгин ик концертн залд ясврин көдлмш кех кергтә. Дөчн жилин туршарт энд капитальн ясвр кегдәд уга. Үвлин кемд артистнр киитн герт кесг частан репетиц кенә. Государствин халхас дөн күргхинь эдн күләжәнә. Эн жил капитальн ясвр кехин төлә дөрвн зун сай арслнг ирх зөвтә. Ода танһчин тосхлтын министерств кергтә документац белджәнә.

Дөчн жилин эргцд эн сценд нарта-делкәд нер туурсн олн артистнр ирж билг-эрдмән үзүлсн билә. Энд алдр дуучнр Муслим Магомаев, София Ротару, Лев Лешенко болн талдан чигн артистнр танһчин улсиг байрлулсмн. Харм төрхд, өдгә цагт энд нертә артистнр ирж концерт үзүлж чаджахш. Иим артистнр концерт үзүлхин төлә кергтә техническ арһ уга болжана. Калмгосфилармоня директор Аркадий Манджиевин келсәр, цаг сольгдв, ода хөрн негдчг зун жил. Мана хәләһәчнр чигн сольгдв. Эдн Әрәсән болн һазадын ордудын нертә артистнриг үзх саната.

Концертн залын гер хуучрад, му дүрс һарв. Декорай сольдг механизм зеврәд үрж одв. Оркестрин бәәрн бас хуучрад, киттн болна. Көгжмчнр хойр-һурвн частан даарад, репетициг әрә гиж дааж һарна. Тер мет электрокүчнә оборудовань дөчн жилдән сольгда уга.

Калмгосфилармоня директорин дарук Алексанлр Убушиевин келсәр, арһ-чидләрн зәрминь сольх арһ учрв. Зуг энүнә ик зунь дөчн жил хооран углж тәвгдж. Дәкәд болхла, герин колонн болн эрснь нурад унх әәмшгтә. Дару-дарунь подвалас ус һарһж авна. Һазр дорас һарчах усн ик әәмшг учражана. Ахр болзгт энүнд ясвр эс кехлә, гер хурад унх. Акустическ систем бас икәр хуучрв, сцен деер болхла сән герл уга. Иим күнд бәәдлд туссн бийнь, танһчин хамгин ик концертн зал дик чинртә сойлын керг-үүлдврмүд болна. Жил болһн энүнд һурвн зун концерт бүрдәгднә. Иим күнд таалд танһчин артистнр хәләһәчнрән байрлулхар зүткжәнә. Шинрүлгдсн концертн залд сән таал бүрдәгдх гиж эдн нәәлжәнә.

Арстана Светлана, Хулхачин Николай