Бичкн бөкнр болн футболистнр дииләчән йилһв
СССР-ин спортын мастер Алтай Дорджиевин санлд нерәдгдсн марһанд танһчин бичкн зун бөк чидлән сөрв. Эдн арвн негн чиннүрин категорьт дииләчән йилһв. Уйн наста футболистнр болхла Әрәсән физическ культурин болн спортын ачта көдләч Виктор Асархиновин санлд нерәдгдсн турнирт наадв.
Эдиль Мучкаев греко-римск янзар бөк бәрлдлһнә спортар дөврн жилдән соньмсжана. Эн марһанд зун хөрн килограммин чиннүрт түрүн орм эзлв. Тегәд Өмн үзгин федеральн округин марһанд орлцх зөшв авв. СССР-ин спортын мастер Алтай Дорджиевин санлд нерәдгдсн танһчин греко-римск янзар бөк бәрлдлһнә марһан зурһан жилдән болжана. Энүнд арвн тавн — арвн зурһан наста бөкнр орлцна. Ут-тоодан эн жил найн спортсмен дөрлдв. Эднд дунд билгтә бөкнр бәәнә. Иргчдән эдн Минигян Семеновла әдл сән күцәмж бәрх ицл бәәнә. Бичкдүдиг дөннхин төлә эднә ах үйнр ирв. Эднә зәрмнь Әрәәсн баһчудын хамцу командын ханьд орв. Арвн нәәмн наста Дорж Бочаев ЮФО-н болн Әрәәсн марһасин призермудын тоод орла. Лаганьд дамшлтан өөдлүлв. Сүл зурһан жилдән танһчин бөк бәрдлдлһнә академьд сурчана. Москван "Спарта" школд чигн сурх саам учрв. Дорас өсж баһ наста бөкнриг өсклһнд Лаганск, Хар Һазра болн Ик-Буурла райодт нүүрлгч ормд йовна. Эдн академьд сурна, танючин командын ханьд оржана. Эн саамд танһчин марһанд Әәдрхн балһсна элчнр орлцв. Эдн цугтан негдгч тойгта бичкдүдин школын сурһульчнр болжана. Эдн Элст балһснд болдг марһанд оньдин ирж орлцна.
СССР-ин спортын мастер Алтай Дорджиевин санлд нерәдгдсн марһана ашар хамгин сән бөкнр Әрәсән Өмн үзгин марһанд орлцх зөв авхмн. Энүнд арвн негн чиннүрин категорьт бөкнр дииләчән йилһв. Призермуд февралин арвн тавнд Краснодарск крайин Славянск на Кубани балһснд болх дөрлдәнд ноолдх. Диилвр бәрсн көвүд болхла Өмн үзгин федеральн округин марһанд орлцх зөв авх. Спортын комплексин талдан плошадкд болхла арвн негн — арвн хойр наста көвүд мини-футбольн марһанд дииләчән йилһжәнә. Энүнд нәәмн команд орлцжана. Эднәс хойрнь — олимпийск көрнгин танһчин школын хойр команд болн Лаганск, Яшкульск, Ик-Буурла болн Приютненск райодын элчнр. Тер мет марһанд Волгоград балһсна “Зенит” болн Ставропольск крайин Буденновск балһсна “Атлант” командс бас нааран ирж дөрлджәнә.
Футбольн марһан Әрәсән физическ кульурин болн спортын ачта көдләч Виктор Асархиновин санлд нерәдгджәнә. Энүнә өрк-бүл шишлнг мөрә тогтав. Тет мет диилвр бәрсн команд кубокар ачлгдх. Тер мет талдан чигн шишлнг мөрә бичкдүд шүүж авчч адх. Танһчин бичкдүдин школын бүрдәх дарани марһан февралин арвн зурһанд болх. Энүнд арвн-арвн негн наста көвүд дииләчн йилһхмн.
Татьяна Зубцова, Очра Сергей
