Иргч сунһврт мана танһчд участкин сунһлһна цуг комиссь көдлмшт белн болв
Иргч сунһврт мана танһчд арвн дөрвн территориальн болн хойр зун тәвн һурвн участкин сунһлһна комиссь көдлмшт белн болв. Энүнә тускар танһчин сунһлһна комиссин ахлач Александр Дикалов зәнглв. Цуг участкт кергтә залһлдана, әәмшг уга бәәлһнә эв-арһ бәәнә, цуг хораст дулан. Эндр танһчин сунһлһна комиссь цуг участкт найн тавн минһн бюллетень түгәж өгх.
Эндр Элст балһснд «Мы такие как все, только сильнее» нертә жил болһн бүрдәгддг керг-үүлдвр болв. Зурһан жил дарандан давулгджах керг-үүлдврин бүрдәһәчнр инвалид улст онц оньг болн килмж тусхах саната. Ода мана танһчд инвалид улсин ниицәнд хойр ми3һн дундур күн оржана. Эднәс ик зунь өдр болһн талдан улсла иигж харһж күүндх арһ уга болна. Иим улсин төлә мөнгн баһар йилһж өггдг болв чигн, Элст балһснд инвалид улсин төлә кергтә таал бүрдәлһнд түрүн ишкдл кегдв. Хотл балһсна цутхлнгд тергәр йовдг улсин төлә пандус болн шишлнг бәәрн тосхгджана. Уульнцд шишлнг светофор бәәнә. Эндр бүрдәгдсн мастер-класс болн олн-зүсн спортын марһас күнд-түрү бәәдлд туссн улст урмд өгәд, олз-туста болсн деерән, чеежин сергмж өгхнь лавта.
