Игорь Зотов Үстин районд одв
Хальмг танһчин правительствин ахлач Үстин района толһачла района һол төрәр — Цаһан Амн поселкин улсиг уудг усар тетклһнә төрәр күүндвр кев. Давсн бембә өдр Игорь Зотов Үстин районд көдлмшин кергәр одв. Тенд премьер-министр района цутхлнг селәнә социальн ик чинртә обьектмудла өөрхн таньлдв, бәәрн предприятьмудын болн организацсин һардачнрла харһад күүндв. Үстин районд мана үүдәгч баг бас одад ирв.
Үстин района делгрлтин хойр һол төрмүднь — хату девскртә хаалһс болн уудг усн. Энүнә тускар нааран ирсн танһчин правительствин ахлач Игорь Зотов келв. Танһчин премьер-министр Игорь Зотовин келсәр, районд ода хойр төр — усна болн хаалһин төр хаһлх кергтә. Мөнгн тана өмн урсад йовж одна гиж сангдна.
Районд уудг усна төр хамгин хурц төр болжахин тускар Игорь Зотов Эрдниевский селәнд бәәх цевр усна көрнг болн Цаһан Амн селәнд бәәх ус авдг булг болн насосн станц хәләхләрн ил медв. Эрдниевский селәнд бәәх цевр усна көрнгин төр хаһлгдв. Удл уга нааран нег минһн кубометр ус орулх зура бәәнә. Цаһан Амн селәнә улст болхла усна төр хамгин хурц төрт хүврв.
Ижл һолд экологическ му бәәдл тогтснас көлтә һолын ус киртә. Эннь усна чинрт му нилчән күргжәнә. РМО-н толһач Леонид Кейгерин келсәр, өөрхн иргч Цаһан Амн селәнә улсиг сән чинртә уудг усар теткхин төлә насосн стансциг Ижл һолын урсхлын деед күргж тәвх кергтә. Тер мет шин насосмуд бас сольх төр тәвгджәнә. Ода көдлжәх оборудованяр иргч нег — хойр жилд усар теткж болх. Зуг энүнә хөөн селәнә усн уга үлдх әәмшг бәәнә. Иим бәәдл чиклхин төлә зурһан сай арслнг кергтә. Зуг РМО-д иим мөнгн ода деерән уга.
Үстин района толһач Леонид Кейгерин келсәр, бидн хоосн мөнгн өгтн суржахшвидн. Мөнг йириндән күн өгшго. Инвестормуд олж авхд нөкд болх кергтә. Эн төрт онц оньг тусхажана. Усна төриг эрк биш хаһлх кергтә.
Тегәд ода Үстин районд селәнә улсиг уудг усар тетклһнә төр хамгин ки чнр зүүжәнә. Тер мет энд хаһлх талдан чигн төрмүд дала. Үлгүрнь, эврә спортын зал Цаһан Амна гимназьд уга, спортивн плошадк бас кергтә.
Бичкдүдин садт болхла бәәдл му биш. Хойр жил хооран энд садмудт бичкдүдин төлә немр найн орм секгдв. Зуг сүл цагт нилх төрлһнә то өсәд, дошкольн учрежденьд ясельн багд немр орм секх кергтә болжана. Энүнә төлә мөнгн болн ирлцнһү бәәрн керглгджәнә. Бичкдүдин садын һардач Наталья Манджикован келсәр, сурһулин шин жиләс тавдгч ясельн баг секх зура бәәнә. Тегәд һурвн баг секх арһ бәәнә. Ода энд дөчн йисн көвүн-күүкн чеерүдт бәәнә.
Района предприятьмудын болн организацсин һардачнрла болсн харһлтд танһчин правительствин ахлач Игорь Зотов темдглсәр, районд хаһлх төрмүд олн, зуг эдниг чидлән негдүләд хаһлж болх. Игорь Зотовин келсәр, районд бәәсн әмтнә төлә хаһлх төрмүд дала. Иим күнд бәәдлд бәәсн бийнь район уралан девшжәнә. Эдниг дөннх кергтә.
Елена Алексенко, Ирчин Алексей
