Хальмгт бамб цецгүдин фестиваль болв

Хальмг танһчд бамб цецгүдин түрүн фестиваль болв. Эн керг-үүлдвр танһчин правительствин медлд экологическ туризмин делгрлтин программар бүрдәж давулгдв. Эн өдр Приютненск районд бамб цецгүдин цецгәрлт һәәхин төлә Әрәсән булнг болһнас хойр зун турист ирв.

Приютненск района аһуд өвәрц бамб цецгүд жил болһн иим олар цецгәрнә. Улан, цаһан болн шар бамб цецгүд нааран ирсн йитмжд дурта улсин зүрк авлв. Хальмгин теегт эн өдр Әрәсән олн балһсдас кесг гиичнр ирв. Биолог болн профессиональн фотограф Валерий Мосейкин олн орн-нутгудт одсн билә. Зун иим ке-сәәхән тег түрүн болж үзжәнә.

Саратов балһснас ирсн биолог Валерий Мосейкина келсәр, тег дегд сәәхн. Иим һазр хәәдг фотографмудт хальмгин тег йир сәәхн һазр. Хальмг танһчин аһуд зерлг күн көндәһәд уга һазр дала. Европд иим һазр ховр.

Бамб цецгүдин хамгин сән зург асхлад, нарн сууһад уга кемд салькн номһрхла цокж авгдна. Валерий Мосейкин фотозургудан тер дарунь интернетд орулна. Энүнә ке-сәәхн үүдәврмүдин йиртмжин бәәдлиг талдан улс һәәхж чаджана. Энүнә көдлмшәр олн улс соньмсжана. Нег өдрин эргцд кесг минһн күн энүнә фотозургуд хәләв. Бамб цецгүдин фестивалин бүрдәһәчнрин келсәр, мана танһчд экологическ туризмин делгрлтин төлә цуг таал бәәнә.

Танһчин правительствин ахлачин дарук, эрдм-сурһулин, номин болн сойлын министр Лариса Васильеван келсәр, бам цецгүдин фестиваль бүрдәх сән санан орв. Мана дорас өсж йовх баһчуд йиртмж харслһна төрт онц оньг тусхах зөвтә. Энүнәс иштә экологическ туризм деглрүлх кергтә болжана.

Ке-сәәхн бамб цецгүдиг һәәхсн деерән, Хальмг танһчин теегт өвәрц болн ховр мал-аһрус болн шовуд үзж болхмн, тер тоод теегин гөрәс, өөшг пеликанмудыг, бор өнгтә тоһру шову болн талдан чигн шовуд үзж болх.

Фотоэкспедиция в дикую природу нертә ниицәнә генральн директор Дмитрий Мосейкина келсәр, ода экологическ турзмин тускар олн улс келнә. Зуг энүг яһж бүрдәхинь күн сәәнәр медхш. Нааран ирәд, хоосн бамц цецгүд, өвәрц мал-аһрус һәәхсн керг биш. Эннь туризм биш. Иим һазрт олн әмтн ирәд, мөнгән һарһад, эн мөнгиг эргндк йиртмж харслһнд йовулх кергтә. Эннь хамгин һол керг.

Фествиалин йовудт цокж авсн зургудан Әрәсән номтнр эн жилин намрар Испаньд болх йиртмжин нарта-делкән конференцд үзүлхмн. Онц темдглхд, фестивалин йовудт нег чигн турист бамб цецгүдиг таслж авсн уга. Иим фестиваль жил болһн бүрдәх шиидр батлж авгдв.

Арстана Светлана, Очра Сергей