Хөд кирһлһн төгсжәнә

Хальмг танһчин эдл-ахусд хөд кирһлһнә көдлмш төгсжәнә. Эндр өдрт зун найн долан минһн хөөнәс ноосн кирһж авгдв. Ут-тоодан зурһан зун тонн ноосн кирһж авгдсмн. Баһ Дөрвдә болн Яшалтинск райодт эн дааврта көдлмш төгсв. Талдан райодт тер тоод Хар Һазра районд хөд кирһлһнә ашиг июлин нег шинд диглх саната. Темдглсн болзгт эдн көдлмшән төгсхий аль угай?

Хар Һазра района Гагарина нертә унитарн предприятин кирһлһнә пунктд көдлмш гүргүдән. Нег өдртән энд нәәмн зун хөн кирһгднә. Иим йовудтаһар июлин нег шин күртл дааврта көдлмшиг төгсәх зура бәәнә. Нег үлү эн жил хөд кирһлһнд дамшлтта кирһәчнр орлцжана. Бадма Костиков, Пилял Семенов, Анжа Чевдюев тавн-зурһан жилдән иим көдлмш күцәжәнә. Эднәс талдан көдләчнр сән үлгүр авч көдлжәнә. Дамшлтта кирһәчнр сән үзмж бәржәнә.

Гагарина нертә СПК-н ах зоотехник Бадма Манджиевин келсәр, хамгин сән кирһәчнр өдртән зун-зун хөрн хө кирһнә. Баһчуд бас дуран өгч көдлжәнә. Ах улсас дамшлт хоршажана.

Эдл-ахун һардачнр кирһәчнрт көдлмшин цуг таал бүрдәв. Эн жил кирһлһнә пунктын көдләчнрин төлә шин гер тосхв, энүнд хот кедг һазр бәәнә, столовд хот-уухд цуг таал бүрдәгдв, амрлһан хорад көдләчнр үдин кемд амрна. Тер мет хөд кирһлһнә ашар мөнгнә мөрә нүүрлгч көдләчнрт бәрүлж өггдх.

Ах зоотехник Бадма Манджиевин келсәр, кирһлһнә көдлмшин йовудт кен сәәнәр көдлжәхин тускар то-диг кегджәнә. Сән чинртәһәр хөд кирһсн улст аштнь мөнгнә мөрә өггдх.

Хар Һазра районд нәәмн эдл-ахусас һурвнднь хөд кирһлһнә көдлмш төгсв. Долан хонг болад эдн бас дааврта компаниг төгсәх. Специалистнрин тааврар, ут-тоодан районд эн жил тавн зун тонн ноосн кирһгдж авх зурата. Ода дундлад хөн болһнас дөрвн килограмм хойр зун грамм ноосн кирһгдж авгджана. Эн жил районд зун хөрн минһн хөөнәс ноосн кирһгдж авгдх. райоан агропромышленн делгрлтин әнгин көдләчнрин иткүлсәр, эн жил хөөнә ноос хулдлһна халхар боомтг учршго.

Хар Һазра района администрацин агропромышленн халхин делгрлтин әнгин ах зоотехник Михаил Болдыревин келсәр, эн жил хөөнә ноосн цевр. Энүг боомтг угаһар хулдж болх. Мана эдл-аху Невинномысск болн Карачаево-Черкессин ноос уһадг фабрикла бооца кев. Давсн жилд цуг ноосиг хулдж чадв. Нидн жил дөрвн зун хөрн зурһан тонн ноос хулдла, эн жил тавн зун тонн ноосн хулдгдх.

Тер мет эн өдрмүдт танһчин крестьянск-фермерск эдл-ахусд болн онц эздүдин эдл-ахусд хөд кирһлһнә көдлмшин аш диглжәнә.

Чучян Валентина, Бадмаран Владислав