Хәәврин отряд дәәнә цага зер-зев олж авв
Төрскән харсгч дәәнә цага олж авсн зер-зев ФСБ-н болн МЧС-ин көдләчнрт өггдв. Иим кесг минһн зер-зев Астраханск хәәврин отряд олж авв. "Лотос" нертә хамцу отряд хөрн жилдән көдлжәнә. Эн отряд Яшкульск районд немшин зер-зев олж авла.
Андрей Царев болн Сергей Белобородов хәәврин отрядт кесг жилдән көдлжәнә. “Лотос” нертә хамцу отрядын ханьд эдн хальмгин теегт дару-дарунь ирнә. Эн саамд эдн дамшлтарн хувалцхар ирж. Эдн дәәнә цага зер-зев олж авч. Эднә келсәр, хәәвр кех һазриг эндүрлго шүүж авв. Урднь эдн бас эн һазрт төрскән харсгч дәәнә цага зер-зев олж авсмн.
Отрядын гешүн Сергей Белобородовин келсәр, нааран ик эрт ирж. Харнһу билә. Экләд малтхла, генткн аппарат докья өгв. Энүнд кесг зер-зев олдв.
Дәәнә цага зер-зев һазрт гүүндән күсдундур метрт бәәж. Энүг олж авсна хөөн хәәврин отрядын гешүд тер дарунь һардачнрт зәнг өгв. Уд луга нааран зөв-йосна оргнамудын, ФСБ-н болн МЧС-ин көдләчнр ирв. Специалистнр олж авсн зер-зевиг шинжлж хәләв. Эднә келсәр, зун миллиметр һучн мин, Маузер нертә винтовкин нег минһн тавн зун хөрн һурвн сумн олж авгдв. Эднә кесн шинжлтын хөөн зер-зев уга кегдв.
Астраханск хәәврин отрядын гешүд иим кесг олвр малтж авч. Лотос нертә хәәврин отрядын туужин хөрн жилин эргцд дәәнә цага кесг тоот олж авгдв. Баһчудын төрскнч, зөв-йосна болн физическ делгрлтин областин олна организацин һардач Александр Даировин келсәр, “Лотос” нертә хәәврин отряд Хальмгин хәәврин отрядла өөрхн залһлда бәрж көдлв. Эн жилмүдт хулхт селәнә өөр болсн дәәлдәнд әмнәсн хаһцсн зурһан минһн советск әәрмин салдснрин нерд медж авгдв. Баатр-зөрмг харсачнр төрскн һазран немшнрт өгсн уга, хортан церг харслһна межә давж һарһулсн уга. Мана орн-нутгин өмн үзгин ик чинртә обьектмуд эзлж авх зураһинь күцәхд харш болв. Баһчудын төрскнч, зөв-йосна болн физическ делгрлтин областин олна организацин һардач Александр Даировин келсәр, хамцу көдлмшин ашт нег минһ аһар салдсин цогц олж авгдв. Кесг медальон олдв. Салдсннрин нерд илткгдв. Энүнд хамльгин баһчудын ик тәвц бәәнә. Тер мет Яшкульск района администрацин толһачин ик нилч бәәнә. Иим көдлмш баһчудт сән сурһмж өгнә. Жирн һурвн күүнәс арвн нәәмн күнд зангта көвүд. Эднд онц оньг өгх кергтә.
Хальмг танһчин болн Астраханск областин хәәврин отрядмудын олж авсн материалмуд цергә туурмжин музей бүрдәлһнә ул болв. Һучн дөрвдгч дивизин салдснр немшнриг зогсаһад, төрскн һазран харсж авсмн. Эднә салдснр баатр-зөрмг кевәр дәәлдсн тускар журналистнрт технологическ колледжин негдгч курсын оютнр келж өгв. Ода колледжин сурһульчнр эврән хәәврт орлцна, төрскн һазран харсж авсн салдснрин нер сергәж авх даалһвр күцәжәнә. Эднә ах наста хәәврин отрядын гешүдин эклсн кергиг уйн наста сурһульчн цаарандан делгрүлжәнә. Ода Яшкулин һазрт эдн эврәннь ах улстаһан намрин хәәврин көдлмш күцәжәнә.
“Лотос” хәәврин отрядын гешүн Алексей Демидовин келсәр, түрүн дәкж иим көдлмшт орлцсн цагт тас юм меддго бәәж. Ямаран церг Әәдрхн балһс харссн тускар, юунас сумм тогтсна тускар меддго билә. Эврәннь нүдәрн үзәд, ода меддг болв. Мана һазриг харссн өвкнрин нерд илткж авх кергтә. “Лотос” хәәврин отрядын һардач Наталья Буянован келсәр, иим көдлмш кежәх баһчудт байрлжана. Эдн өсхләрн сән улс болна. Эднә зәрмнь ик цолта көдлмшт орна, зәрмнь багшин хаалһ шүүж авна. Энүнә кергиг цаарандан күцәжәх баһчудт ханлт өргжәнә. Зәрм улс бичкдүдән дахулад ирнә.
Эн жилин хәәврин көдлмшт баһчуд түрүн болж орлцжана. Көвүд-күүкдин келсәр, иргчдән эдн бас иим көдлмшт орлцх саната. Нааран эдн иргч жилин зунар хәрү ирх.
Чучян Валентина, Хулхачин Николай
