Цаһан Амна гимназь Әрәсән хамгин сән школмудын тоод орв
Хальмг танһчин хойр школ Әрәсән тавн зун хамгин сән школмудын тоод орв. Иим аш эсвин эрдм-сурһулин Москван цутхлнг РИА “Новости” агентствин болн “Учительская газета” зәнглһнә дөнгәр болн Әрәсән эрдм-сурһулин болн номин министерствин дөнгәр кев. Иим тоод давсн сурһулин жилд эрдм-сурһулин халхар сән үзмж бәрсн эрдм-сурһулин учрежденьс орв. Хальмг танһчд нидн жил хамгин сән күцәмж Элстин лицей болн Цаһан Амна гимназь бәрсн билә.
Эн саамд Әрәсән далн долан региона тәвн минһн школын көдлмш шинжлгдв. Эдн хойр кемжәһәр үнлгдв — сән чинртә эрдм-сурһуль өглһн болн бичкдүдин билг-эрдм делгрүлһн. Хамгин сән гисн тавн зун школас салу спискд тәвн дөрвн селәнә эрдм-сурһулин учреждень орв. Эн тоод Үстин района Цаһан Амна гимназь йовна. Селәнә багшнрин тоолврар, селәнә школмудыг салу спискд орулснь сәхн урмд өгәд, эднә делгрлтд сән нилчән күргжәнә.
Цаһан Амна гимназин директорин дарук Татьяна Лазареван келсәр, гимназин зурһан сурһульч хойр жил дарандан цугәрәсән олимпиадын товчлгч девснгд орлцла. Эднәс тавн сурһульч призермудын тоодь орв, диилвр бәрв. Хойр жил хооран школын көвүд-күүкд бас призермудын тоод орсмн.
Цаһан Амна гимназь хамгин сән школмудын тоод орснд зуг өөдән мергжлттә багшнрин нилч биш, энүнд сурһульчнрин билг бас тоод авгдв. Гимназин көвүд-күүкд биологин болн экологин предметар оньдин цугәрәсән олимпиадт призерммудын тоод орна, диилвр бәрнә. Иляна Горяева, Виктория Сарангова, Данара Минтеева, Кристина Ротт болн Юлия Шувалова нидн жил Оренбург балһснд болсн сурһульчнрин цугәрәсән олимпиадт диилвр бәрәд, призермудын тоод орв. Эднд Әрәсән Президентин мөрә жирн минһн болн һучн минһн арслнг өггдв.
Цугәрәсән олимпиадын дииләч Иляна Горяеван келсәр, олимпиадлын йовудт гүн медрл авч чадв. Иим медрл иргчдән олз-туста болх. Өсхләрн экологин болн биологин халхар көдлх санан бәәнә. Сән эмч болх зурата.
Олимпиадын дииләч Виктория Сарангован келсәр, эн жил цугәрәсән хйор олимпиадт орлцв. Түрүләд экологин олимпиадт диилвр бәрж чадв. Долан хонг болад биологин олимпиадт орцлв. Тендәс лауреат болж хәрж ирв.
Шин төсвин зокьялчнрин тоолврар, хамгин сән школмудын тоод орсн сурһулин заведеньс талдан школмудт үлгүр-үзмж болх зөвтә. Тер мет хамгин сән школмудын улд дамшлтарн хувалцх болн багшнрин мергжлт өөдүлх федеральн плошадк бүрдәх зура бәәнә. Цаһан Амна гимназьд баһ наста багшнрла танһчин хамгин сән гисн багшин негнь, Әрәсән ачта багш Нина Ходжаева байн дамшлтарн хувалцжана.
Әрәсән ачта багш нина Ходжаеван келсәр, иим сән күцәмж бәрснә тускар келхлә, энүнд онц нуувч уга. Кесг жилдән олимпиадт орлцдг бичкдүдлә шишлнг үүдәгч көдлмш кегднә. Тавдгч классас авн сурһульчнриг шүүж авад, экологин болн биологин предметар эднд гүн медрл өгнә. Тер мет эднд Ижлин көвәд бәәх эклогическ лагерь ик дөн күргжәнә. Гимназин сурһульчнрин белдсн төсв хамгин сән гиж үнлгднә. Эдн цугәрәсән олимпиадт орлцсн деерән, олн-зүсн марһаст бас медрлән үзүлнә. Москвад болн Ростов-на-Дону балһснд болсн марһанд алтн, цаһан мөнгн болн күрл мөнгн медальмуд шүүж авла.
Хальмг танһчин хамгин сән гисн школд ода һурвн зун арвн негн сурһульч сурчана, эднәс негдгч класст арвн йисн көвүн-күүкн оржана. Эднд багшнрин ни-негн коллектив медрл өгчәнә, тер тоод Әрәсән Федерацин ачта хойр багш, Хальмг танһчин зурһан ачта багш көдлжәнә. Өдгә цагт Цаһан Амна гимназин сурһульчнр болн багшнр сән күцәмж бәрж уралан девшжәнә.
Бевина Мергн, Бадмаран Владислав
