Хулхт поселкт Элстин лицейин сурһульчнр одв
Эн жил алдр хөрн нәәмдгч әәрм тогтсна далн жилин өөн темдглгдхмн. Эн церг төрскән харсгч дәәнд Хальмг танһчин немшнрәс сулдхж авсмн. Дөчн хойрдгч жилин сентябрь сард бүрдәгдсн хөрн нәәмдгч әәрмин салдснр Хулхт поселкин өөр Әәдрхн болн Ижл һолд күрхәр седсн хортыг зогсав. Эн өдрмүдт танһчин школмудын сурһульчнр дәәнә цагин туужла өөрхн таньлджана. Элстин лицей ФСБ-н заллтин көдләчнрлә хамдан туужин кичәлмуд бүрдәж давулжана.
Элстин лицейин сурһульчнр хөрн нәәмдгч Әәрмин дәәлдәнә туурмжин хаалһар киәчл кев. Яшкуль селәнд көвүд-күүкд гимназин школьн музей һәәхв. Энд бәәх экспозиц нурһлж хөрн нәәмдгч әәрмд нерәдгджәнә. Тер мет Элстин сурһульчнр Геүүрджәх эк нертә мемориалд одв.
Энд әмнәсн хацһсн салдснр оршагдсмн. Хот балһсна дорас өсж баһчудт иим экспонатмудыг эврәннь нүдәрн үзәд, Хальмг танһчин дәәнә цагт немшнрәс сулдхсн улсин тускар медж авхла сән болх гиж туужин багш Светлана Шевенова келж өгв. Элстин лицейин туужин багш Светлана Шевенован келсәр, төрскнә дурн эврәннь һазран, дәәнә цагт энүг харссн улсиг күндлһнәс авн эклнә. Яшкулин һазр әрүн һазр болжана. Юнгад гихлә төрскән харсгч дәәнә йовудт энд хамгин сүркә дәәлдән болж.
Тер өдрин бийднь лицеистнр Хулхт поселкд күрв. Энд нег минһн йисн зун дөчн хойрдгч жилд сүркә дәәлдән болсмн. Энд немшнриг Советск Союзин салдснр зогсаж чадв. Эндәс Хальмг танһчин тег экләд хортнас сулдхгдв. Школьн музейин һардач Екатерина Манджиева болн уйн наста экскурсоводмуд Элстин лицейин сурһульчнрт Наташа Кочуевскаян, Всеволод Ширяевин болн талдан чигн салдс баатрмудын тускар келж өгв. Лицейд туужин предмет гүүнәр дасжах сурһульчнрт иим экскурсь йир олз-туста болв.
Танһчин сурһульчнр ФСБ-н заллтин офицермудла хамдан Диилвр тетксн салдсннрин оршаврт одв. Эднә цогциг Хальмгин хәәврин отрядын гешүд олж авла. Сурһульчнр болн заллтин көдләчнр Хулхтын мемориальн комплекст цецгүд тәвв. Көвүд-күүкдин келсәр, иим туужин кичәлмүдиг дару-дарунь кехлә сән болх. Элстин лицейин арвдгч классин сурһульч Ангелина Яблуновская келсәр, эндрк экскурсин хөөн дәәнә тускар дәкәд нег уха тунһаж болв. Иим музеймуд бәәхлә, улсин санл мөнкинд үлдх.
Элстин лицейин арвдгч классин сурһульч Санчр Манджиевин келсәр, олн соньн тоот медж авх арһ учрв. Туужин халхар бичх көдлмштән шин медрлән олзлх саната.
Ода харм төрхд, школмудын сурһульчнрин ик зунь Хальмг танһһчин аһуд дәәнә цагт ямаран дәәлдән болсн тускар медхш. Тегәд иим медрлиг туужин багшнр болн иим экскурсь өгх зөвтә.
Бевина Мергн, Ирчин Алексей
