Городовиковск районд олна приемна көдлмшт хуралын депутатнр дөн болв
Селәдт һазр дорас давста усн һарч иржәнә, газар тетклһнә төр, хаалһс тосхлһна болн бәәдг гермүд бәрлһнә төрмүд хол селәд-поселкст бәәх улсиг үүмлжәнә. Эн хурц төрмүдәр кесг әмтн олна при емнд ирәд дөн сурна. Иим приемн ода цуг райодт үүлджәнә. Августын нег шинәс авн эднд Хальмг танһчин олн-әмтнә хуралын депутатнр нөкд болжана.
Городовиковск района зәрм поселксин хамгин хурц төрнь — һазр дорас давста усн һарч иржәнә. Тегәд энд эрк биш усна сурвлж татх кергтә. Веселое селәнә улст иим кевәр ус өгхин төлә найн хойр сай арслнг кергтә. Энүнә төлә цуг кергтә документац ода белн. Нег үлү, иим төсв района талдан чигн селәдин төр хаһлх. Эн туст танһчин селәнә эдл-ахун министерств кесг жилдән тас тагчг бәәнә.
Олна приемнд усар тетклһнә төр талдан чигн селәнә улсин бәәрн әмтн келв. Эн төрин тускар Хонһр Эльбиков селәнә эдл-ахун министертвд күргж медүлх саната. Эднлә хамдан эн төриг хаһлх кергтә. Большой Гок селәнә улсмиг газар тетклһнә, хаалһ тосхлһна, олн үртә эк бәәдг гер хулдж өглһнә, Земский доктор нертә программин төр хаһлһна болн талдан чигн төрмүдәр күүндвр һарв. Черевкон келсәр, нег школд санэпидстанц нег жилд тав-зурһа дәкж ирв. Эннь бас хажһр болжана.
Бичкдүдин садмудын һардачнриг болн школмудын директормудыг зовах керг уга гиж хуралын ахлачин дарукд Борис Черевко келв. РМО-н толһачин келсәр, деед бәәх ведомствс хоорндан эс зөвшәрснәс көлтә райодын һардврин үүлдвр күндрнә. Городовиковск дундын школын директор Галина Макаренко болхла сурһульчнрт өнгәр учебникүд өглһнә төрә хуралын депутатнрт сурвр өгв. Тер мет танһчин школмудт мөнгнә халхар дөн болх кергтә гиж дамшлтта багш келв. Городовиковск балһсна дөрвдгч школын директор Галина Макаренкон келсәр, хамр төрхд сүл хойр жилд иим мөнгн районд иржәхш. Тер тоод учебникүд хулдж авдг арһ уга болжана. Района больниц болхла ода деерән эрүл-менд харлһна халх шинрүлһнә программд орад уга. Энд капитальн болн талдан чигн ясвр кехин төлә кесг сай арслнг мөнгн кергтә. Деерәс дөн күләлго, эдн эврән эн күнд төриг халһжана. Городовиковск района больницин ах эмч Баир Цеденовин келсәр, нидн жил поликлиникин гер ясхин төлә спонсормуд хәәһәд, администрацин дөнгәр мөнг орулж авх зура билә. Энүнә төлә дала мөнгн кергтә болх.
“Колокольчик” нертә садт бичкдүд яһж бәәхин тускар олн-әмтнә хуралын ахлачин дарук соньмсв. Хальмг танһчин деед үзгин районд ода арвн нәәмн минһн күн бәәршлжәнә. Тер бийнь ода бичкдүдин садмудт чеерүд уга. Энд орм дутхла, талдан көвүд-күүкдиг орулж авх арһ бәәнә. Күнд цагт цуг дошкольн учрежденьсиг бәәрн һардачнр хадһлж чадв. Олн-әмтнә хуралын ахлачин дарук Хонһр Эльбиковин келсәр, Хальмг танһчин зәрм райодт бичкддүин садмуд хадһлж харж чадсн уга. Ода Городовиковск районд долан сад көдлжәнә. Иим дошкольн учрежденьс сәәнәр көдлжәхнь бас сән керг болжана.
Ода деерән эн районд хамгин күнд-түрү бәәдл буудян урһцин халхар тогтв. Эн жил фермермүд һурвн зун минһн арслнг һаруд унв. Эннь тоолсн хамгин баһ кемжән. Борис Черевкон тоолврар, селәнә көдләчнр тер бйинь ицлән геежәхш. Эднд государств дөн болх зөвтә.
Олна малд үвлд күрх хот күцц ьелдж авгдв. Ода танһчин райодт иим олна приемна көдлмш сән зангшалд тохржана. Августын нег шинәс авн эднлә хамдан Әрәсән юристнрин ниицәнә специалистнр бас селәдт көдлжәнә. Өдгә цагт танһчин райодын цуг селәдт одад, тенд әмтн яһж бәәхин тускар сәәнәр медж авх кергтә гиж олн-әмтнә хуарлд тоолжана.
Хавтхна Элла, Очра Сергей
