Хальмгудт Монһл улсин урн һарин билг-эрдм соньн болв

Хальмг Танһчин әмтнд Монһл улсин урн һарин билг-эрдм соньн болв. Элст балһснд Монһл орн-нутгас ишкәһәс кегдлмүд кедг цутхлнгин специалистнр ирсн бәәнә. Эн өдрмүдт нертә зурач—дизайнер Сара Саратуя эврәннь үүрмүдтәһән ишкәһәс олн зүсн кегдлмүд кеж, мастер-класс өгчәнә.

Монһл орн нутгас ирсн специалистнрин мастер класс хәләхәр ик бичкн уга ирв. Элст балһна бәәрн күүкд күн Наталья Талосова эндр өдр ачта амрллһндан бәәнә тегәд эн билг эрдм танд йир соньн болад би нааран ирв гиж медәт келв. Ик кезәнәс авн мана ээж аавнр ишкәһәс олн зүсн кегдлмүд кедг бәәсмн, тегәд эндр өдр эврә нүдәрн үзәд мини чеежм байрлв, хәләсн деерән би бас ишкә авад бичкн Варвара ач күүкндән баальнг келәв.

Нүүдлин кевәр бәәдг улсин бәәдл жирһлд ишкә ор һанцхн эд билә. Энүнәс мана өвкнр терзин хааһул, кевс, хувц хунр уйж кедг бәәсмн. Сүл жилмүдт ишкәһәс кесн хувц хунр баһчуд өмсхдән дурлна. Энүг сәәхн утцар кеерүлчклә күн болһн өмсч чаджана.

Хөөнә ноос идәлһнә көдлмш йир күнд гиж Монһл орн нутгас ишкәһәс кегдлмүд эд бод кедг цутхлнгин специалистнр келв. Хамгин түрүнд хөөнә ноосиг савнгта уснд кесг дәкч уһаһад хагсах кергтә болна, түүнә хөөн кесг дәкч эвкәд, модар цокад идәлх кергтә.

Монһл орн нутгас ишкәһәс кегдлмүд эд бод кедг цутхлнгин специалистнр цааранднь эврәннь мастер классмудан танһчин райодт бәәх улст үзүлхәр сана зүүжәнә. Эднә тоолврар мана өвкнриннь билг эрдмиг эндр өдр дорас өсч йовх баһчуд бичә мартха, эврә нүдәрн үзссн деерән, эврә һарарн авад кехәд өвкнриннь авьяс заншал билг эрдм мартгшго.

Ээнән Дельгр, Бадмаран Владислав