Хальмгин университетд приемна комиссин көдлмш гүргүдән
Эн өдрмүдт Хальмг танһчд приемна комиссин көдлмш гүргүдән орчкв. Эн жил хойр дундур минһн көвүн-күүкн школан төгсәв. Тер мет эн жил танһчин деед сурһульд һазадын ордудын баһчуд сурх саната. Үлгүрнь, хальмгин государственн университетд СНГ-н болн һазадын ордудын элчнр орж сурх зурата.
Эн өдрмүдт хальмгин государтсвенн университетин приемна комиссьт цуг факультетд орх абитуриентнрас документмуд орулж авгджана. Эн жил баһчуд олар эсвин, физикин, болн зәнглһнә эв-арһсин факультетмудт орхар цаас орулж өгв. Энүнд мана үүдәгч баг герч болв.
Яшкульск районас ирсн абитуриент Николай Гаряевин келсәр, университет таасгджана. Тегәд орж сурх саната. Эврәннь көвүнә тоолврла энүнә экнь Светлана Владимировна бас зөвшәржәнә. Светлана Гаряеван келсәр, мана танһчин деед сурһульд гүн медрл авч болжана. Хот-уудг һазр бәәнә, оютнрт обшежить өггднә. Багшн бас сән.
Урдк жилмүдлә әдл хамгин олн баһчуд экономикин болн зөвин факультетд орж сурх саната. Ик-Буурла районас ирсн Уашат Мугамаеван күүкнь эн факультетд сурчана. Эн жил болхла деед сурһульд көвүнь орхар шиидв. Иим эрдм шүүж авсндан эдн байрлжана. Уайшат Мугамаеван келсәр, энд сурчах күүкнь сән эрдмәр сурчана. Аштнь сән медрл авх гиж нәәлжәнә.
Ода энүнә көвүнь иргчин тускар зура темдглж авчана. ЕГЭ-н шүүврин ашар көвүн сән күцәмж бәрв. Тегәд деед сурһульд орж чадх гиж нәәлжәнә.
Курбан Мугамаевин келсәр, деед сурһульд цуг таал бәәнә. Хот уудг сән столов бәәнә. Сән спортивн зал оютнрин төлә көдлжәнә. Багшнр бас байн дамшлтта.
Таджикистанас хальмгин университетд орж сурхар олн көвүн-күүкн ирв. Эдн цугтан ямаран эрдмәр сурхан шүүж авв. Изат Шарипов, Изат Ортуков болн Некруз Мансуров агрономическ факультетд сурх саната.
Эн көвүнә келсәр, нааран ирж сурхар шиидв. Инженерн-техническ эрдм шүүж авч. Агроинженерн эрдмәр сурх саната. Деед сурһульд орад сәәнәр сурх зурата.
Приемна комиссин гешүдин темдглсәр, эн жил давсн жиллә дүнцүлхлә. Хальмгин университетд сурх баһчудын то зөвәр ик.
Хальмгин университетин приемна комиссин ахлачин дарук Ольга Абееван келсәр, эндр өдрт хойр минн абитуриент документан орулж өгв. Урдк жилмүдлә әхдл олн баһчуд юристын, экономикин эрдәмр сурх саната. Тер мет эн жил олн көвүд-күүкд тосхачин, туужин, биологин эрдмәр икәр соньмсжана.
Эн жил Хальмгин деед сурһульд СНГ-н орн-нтугудын элчнрлә хамдан, Монһлын, Китдин, Индин болн талдан чигн һазадын ордудын баһчуд ирж сурх саната.
Харлун Бадма, Колдан Церн
