Элстд хойр шин бичкдүдин сад тосхгджана

Элст балһснд эн жилин чилгч күртл шин хойр бичдкдүин сад эдлврт орулгдх. Энүнәс иштә дошкольн учрежденьст һурвн зун көвүн-күүкн орж чадх. Хальмг танһчин социальн ик чинртә обьектмудын тосхлт бүртклһнә төлә нааран танһчин толһач Алексей Орлов ирв. Шин садмуд талдан иим дошкольн учрежденьсас йилһржәнә.

Бичкдүдин шин садмуд Элст балһсна олн гермүд тосгджах райодт секгдх зөвтә. Сүл цагт хотл балһснд селәнә һазрас олн баһчуд ирж бәәршлжәнә. Специалистнрин келсәр, Шапшукован нертә уульнцд тосгджах хойр зун арвн тавн бичкдүд орх дошкольн учреждень хотл балһсна Өмн үзгт тосхгджах иим учрежденьсас икәр йилһрхмн. Энүнә төсвнь өвәрц. Шин садт үвлин сад, өөмлһнә бассейн талдан чигн дөнцл тосхлтс соньн болн өвәрц кевәр кеерүлгдх. Шин тосхлтын төлә балһсна хазнас зун һучн зурһан сай арслнг йилһж өггдв.

Прорабын келсәр, столовин болн хот-хол кедг оборудовань авад уга. Зуг талдан кергтә долан сай арслнга оборудовань авх саната.

Эн жилин октябрь сар күртл бичкдүдин шин садын гер эдлврт орулхин төлә ода тосхавчнр асхн ора күртл көдлжәнә. Тер мет догшн халун өдрмүд тогтснас көлтә көдлмшин иим чанһ неквр тәвгджәнә. Шин обьектын аһунь ут-тоодан дөврн минһн дөрвлжн метр тогтажана. Кемр иим кевәр көдлмш цаарандан күцәгдхлә, шин садт көвдү-күүкд иргч жилин эклцәр орж чадх.

Һурвдгч тойгта тосхлытн заллтин генеральн директорин дарук Борис Санджиевин келсәр, ода садын герин эрсн тосгджана. Тер мет негдгч давхрин эрсн бәргджәнә. Эннь герин дорд үзгин халх. Эн сарин чилгч күртл негдгч давхрин эрсн тосхгдх, энүнә хөөн хойрдгч давхр экләд бәргдх.

Тер мет Ипподромная уульнцд тосгджах сад бас эвтә һазрт тосхгджана. Специалистнрин темдглсәр, невчк күләхлә, шин тосхлт цаглань эдлврт орулгдх. Ода хойрдгч давхрин тосхлт кегджәнә. Энүнлә зерг өөмлһнә бассейна ул экләд тосхгджана. Шин тосхлтд усар тетклһнә, дула өглһнә болн канализацин систем орулгдв. Тер мет эн көдлмшлә дегц садын дотр хораст бас шалдарин көдлмш кегджәнә. Хальмг танһчин толһач Алексей Орлов хойр тосхлтын йовудыг эврән ирж бүрткв. Энүнә келсәр, иргч жилмүдт танһчин һардвр Әрәсән президентин өгсн даалһвриг күцәһәд, дошкольн учрежденьс дутжах төриг хаһлх саната.

Танһчин толһач Алексей Орловин келсәр, тосхлтын цуг көдлмш темдглсн болзгар кегджәнә. Эн обьектд Өмн үзгин районд тосхлтын көдлмш невчк болзгас хоцржана. Болв тосхачнр энүг күцж темдглсн зурад орх саната. Ипподромн уульнцин садт болхла көдлмш темдглсн болзгт кегджәнә. Тер мет райодт бас шин садмуд тосхгджана. Зәрм райодт ода садт орх чеерүд уга. Чеерүд бәәх райодт садмуд секгдх. Әрәсән Президентин өгсн даалһвриг иргч һурвн жилин эргцд күцәх зура бәәнә.

Эндр өдрт Элст балһсна тавн минһн көвүн-күүкн садт орхар чеерүдт зогсжана. Тегәд чигн ода хотл балһснд хойр дошкольн учреждень тосхгджах зәнг сонсчкад, эк-эцкнр икәр байрлв. Уд луга хотл балһсна һурвн зун бичкдүд шин дошкольн учрежденьд орж чадх. Тер мет талдан бичкддүин садмудыг шинрүлж яслһна көдлмш танһчин һардачнрин бүртклһнд бәәнә. Энүнә төлә талдан организацт өггдсн бичкдүдин садмудын гермүд хәрү дошкольн систмед орулгдж, ясгджана.

Ээнән Ольга, Мятежный Максим