Хальмгин университетд марһан болв

Эрдмин түрүн ишкдл. Иим нерәдлһтә марһан Хальмгин университетин оютнр дунд болв. Иргч жилдән школд көдлх баһчуд дөрлдәнд чидлән сөрхәр шиидв.

Багшнрин коллективд нурһлж күүкд улс көдлжәнә. Тегәд марһанд ик зунь күүкд орлцв. Залу улсас зуг нег күн дөрлдв. Бадма Антонов педагогическ эрдм-сурһулин болн биологин факультетин дөрвдгч курсын оют. Школд дамшлт авчасн кемд, сурһульчнрла яһж хәрлцә бәрхинь медж авв. Эднлә демократическ янз өөрхн болж медгдв. Иим дамшлт баһ наста багшд сән нилчән күргв. баһ наста багшнр яһж бичкдүдлә әрләц тогтах төр хаһлна. Энүнә төлх Бадма олн-зүсн соньн эв-арһ олзлв.

Хальмгин университетин дөрвдгч курсын оют Бадма Антоновин келсәр, багшар көдлж чадхан сөрх саната. Талдан багшнрас ямаран кемжәтәһән медж авх зура бәәнә.

Энүг марһанд дөннхәр хамдан сурчасн күүкд ирв. Бадма эрк биш диилвр бәрх гиж эдн нәәлжәнә. Нег үлү, цаарандан оют магистрант болж сурх.

Данар Мечирова тавдгч курст сурчана. Деед сурһлиг улан дипломар төгсәх саната. Хальмгин филологин факультетин оютна тоолврар, төрскн кел бичкдүдт дасхлһн энүнә һол керг болжана. Эрдм шүүж авсн цагт удан ухалсн уга. Данар Көтчнрә района Ергениский поселк өсж босв. Энүнә өрк-бүлд цугтан халмьг келәр сәәнәр келнә. Күүкнә келсәр, кемр эрдм-сурһулин министр болсн болхла, төрскн кел даслһна программ белдх билә.

Эврәннь багшан дөннхәр Басн Городовиковин нертә Троицк гимназин сурһульчнр ирв. Эднә тоолврар, багшнь түрүн орм эзлх.

Жюрин гешүн, танһчин эрдм-сурһулин министрин дарук Ирина Кавкишеван келсәр, жил ирвәс Хальмгин университет төгсәсн баһчуд школд көдлхдә дурлжана. Эднә то өсәд йовна.

Министрин дарук Ирина Кавкишеван келсәр, эн жил зун арвн баһ наста багшнр школд ирж көдлжәнә. Дәкәд жирн күн дошкольн эрдм-сурһулин учрежденьст көдлжәнә. Сүл атвн жилд эднә то хамгин ик болв. Эннь сән керг. Баһчуд школд кергтә.

Марһана ашар Данара Мечирова диилвр бәрв. Энүг күндлһнә һашгар болн электронн дегтрәр ачлв. Тер мет тавн холван ик стипендь авх. Хойрдчг омр Валентина Есенова эзлв, һурвдгч ормд Александра Хонинова һарв. Эрмд-сурһулин министерств эднд көдлмш олж авхд нөкд болхан медүлв. Деед сурһуль төгсәсн баһчуд эврән көдлмш олж авхд күнд болна.

Батан Санжирма, Эрнжәнә Эрднь