Хальмгин парламентин сессь болв
Эндр Элст балһснд Хальмг танһчин олн-әмтнә хуралын дарани биш хойрдгч сессин сүүр болв. Хальмгин парламент тогтв гиж келж болх. Эндрк сүүрт бүрдәмжин төрмүд хаһлгдв. Дәкәд нег тодлад келхлә, дасн баснг өдр болсн түрүн сүүрт депутатнр олн-әмтнә хуралын ахлачд Анатолий Козачког сунһж авла. Эндрк сүүрт болхла энүнә хойр дарукиг батлж авх кергтә бәәсмн. Депутатнрин хәләврт орулж өгсн хойр кандидатас депутат Никоалй Нуров эврәннь нерән буулһв. Дууһан өглһнә ашт хальмгин олн-әмтнә хуралын ахлачин дарукд Хонһр Эльбиков болн Саглр Бакинова шиидгдв. Урднь зәнглсәр, олн-әмтнә хуралын аппаратын һардачин үүл цга кегдв. Энүнә көдлмшиг парламентин ахлачин нег дарук күцәх. Сүүрт дөрвн комитет тогтагдв, эднә һардачнр батлж авгдв. Хальмг танһчин олн-әмтнә хуралас Федерацин хүүвин элчд Алексей Майоров шиидгдв.
