Хальмгин дууч әрәсән марһанд диилвр бәрв

Әрәсән баһ наста билгтнр нертә марһана дииләчнр йилһрв. Гнесихна нертә Әрәсән көгжмин академин залд болсн концертд әрәсән болн нарта-делкән марһасин лауреат Доржина нертә негдгч тойгта көгжмин школын сурһульч Амулнг Дюдишева билг-эрдмән үзүлв.

Негдгч тойгта көгжмин школын сурһульч Әрәсән баһ наста билгтнр нертә марһана дииләч болв. Энүнә келсәр, иим марһан дууһин эрдм делгрүлсн деерән, артистын билг делгрүлнә. Гнесихна нертә Әрәсән көгжмин академин залд дуулхд дааврта болн амр керг биш. Нармин Морхаджин бичсн шүлгд Стелла Мухтарова айс нәәрүлсн Экин частр дун Амулнг Дюдишеван хамгин дурта үүдәвр болжана. Эн дууг күүкн цуг седклән өгч, дууна гүн учр-утхин медүлхәр дуулна.

Амулнг Дюдишеван келсәр, олн-әмтнә дун йир таасгдна. Энүнд хальмг улсин седкл ухан санан орж.

Амулнг урднь цугәрәсән болн нарта-делкән марһасин лауреат болв. Эн жил Әрәсән арвн хойрдгч баһчудын Дельфийск нааднд орлцх арһ учрв. Энүнә ашар хойрдгч девснгин лауреатын нер зүүв. СНГ-н государствин нәәмдгч Дельфийск нааднд олн-әмтнә дун номинацд алтн медаль шүүж авла. Иим күцәмж бәрснд билгтә дуучиг танһчин толһач Алексей Орлов йөрәв.

Доржина нертә көгжмин школын директор Галина Эняеван келсәр, Амулнг мана школын йоста бахмж болжана. Хальмг танһчин дуучнр Әрәсән баһ наста билгтнрин марһанд иим диилвр бәрсинь тодлхш.

Әрәсән баһ наста билтнр марһан жил болһн бүрдәж давулгдна. Энүнд бичкн билгтнр йилһгднә. Сурһульчнрт иим сән күцәмж бәрхд багшнрин ик тәвц бәәнә. Тер мет эк-эцкнр бас нөкд болна. Амулнгин дууһин багш Стелла Мухтарован келсәр, эн күүкнә билгинь тер дарунь темдглж авч. Энүнд иткәд, эндүрсн уга.

Дууһин багш Стелла Мухтарован келсәр, эн күүкнә ду сонсчкад, йир билгтә күүкн гиж дотран санж. Олн-әмтнә дууна эрдм күүкнә жирһлин хаалһд оньдин дурта эрдм болж үлдхнь лавта.

Амулнг бичкнәсн авн дуулхдан дурта билә. Иргчдән эн эрдм жирһлин хаалһ гиж шүүж авх саната. Ода көгжмин училишд орад, олн-әмтнә дууна эрдмән делгрүлх зурата бәәнә.

Ээнән Делгр, Мятежный Максим