Ах классмудын сурһульчнрин медрл бүрткж хәләгдв
Яшкульск района эрдм-сурһулин учрежедньсиг бүрткж хәләснә ашт эн халхар му бәәдл тогтв гиж сүүрт хальмгин эрдм-сурһулин болн номин министр Лариса Васильева зәнглв.
Яшкульск района зурһан школд, тавн бичкдүдин садт болн немр сурһулин хойр учрежденьд ах классмудт сурһулин чинрин бүрклһн кегдв. Яшкульск района арвн негдгч классин сурһульчнр зәрм предметмудар сән медрл үзүлжәнә. Эдн нурһлж социальн-экономическ халхар иргчдән сурх саната. Эн туст медрл гем уга сән. Болв химийн болн туужин предметмудар тас талдан бәәдл тогтв. района хамгин әсн гисн олн халхта гимназин сурһульчнр химийн предметиг зуг тәвн һурвн процентд меддг бәәж. Туужин предметар болхла хөрн тавн процент. района талдан сурһулин заведеньст медрлин чинрин халхәд орулж өгсн тооцан документд ноль зогсжана.
Министр Васильева иим бәәдл дегд му гиж тоолжана. Иргч хаврар ЕГЭ-н шүүвр өгх кергтә. Тегәд эн халхиг шинжләд, энүг чиклх шиидвр авх даалһвр өгв.
Эрдм-сурһулин министр Лариса Васильеван келсәр, эндрк сүүрт шиидвр батлж авгдв. танючин багшнрин мергжлт өөдлүһнә институтын багшнр нааран ирәд, химин болн туужин багшнрин төлә семинар кех.
Хальмгин университетин ректор Бадм Салаевин тоолврар, химин болн туужин предмедмудар му медрлин нег учрнь — дамшлтта багшнр ховр болжана. Сүүр т орлцсн Яшкульск района администрацин толһач Тельман Хаглышев дәкәд нег учр заав. Урднь бәрсн күцәжмин хзөөн төвкнәд, санамар болв. Эн туст школмудын директормудын үүлдв бас сән биш гиж эн тоолжана.
Тельман Хаглышевин келсәр, кемр районд физикин багшнр дутжахла, иим багшнрт льгот өгх кергтә. Иим кеәвр эдниг нааран дуудж болх.
Сурһульчнрт му медрл өгчәх багшнр репетитор болж көдлжәнә гиж Яшкуль селәнд болсн харһлтд келгдв. Әрәсән эрдм-сурһулин шин закаһар иим көдлмш багшнр күцәх зөв уга. Эдниг уголовн засгла харһулж болх. Тер мет бичкдүдиг хот-хоолар тетклһнә халхәар бас дуту-дундс илткгдв. Бүртклһн кесн кемд сурһулин заведеньсин ик зууднь Роспотребнадзорин танһчин заллтала зөвшәрсн арвн өдрә меню уга бәә Багшнрт дөнцл мөнг өглһнә халхар бас хаһлх төрмүд бәәнә.
Лариса Васильеван келсәр, ода дөнцл мөнгнә кемжән һувн дөрвн процент тогтажана. Урмд өглһнә мөнгн болхла зуг тавн процент. Иим бәәдл чиклх кергтә.
Тер бийнь сүүрт сән көдлмшин утскар бас келгдв. Хальмгин багшнрин көдлмш бүклднь авад хәләхлә, сән үзмжтә болһана. Эднх көдллмш цугәрәсән болн нарта-делкән олимпиадт өөдәнәр үнлгдв. Цаһан Амн селәнә гимназин экологин болн биологин багш Нина Ходжаева сүүрт доклад кев. Энүнә хойр сурһульч одахн цугәрәсән олимпиадт диилвр бәрв. Ходжаеван сурһульчнр хөрн жилдән олн-зүсн олимпиадт орлцад, сән күцәмж бәржәнә. танһчин министр энүнд көдлмшч ормин шин оборудовань белглв. Сүүрин шиивдр яһж күцәгджәхин тускар удл уга медгдх.
Хавтхна Элла, Хулхачин Николай
