Хальмгин билгт нарта-делкән фестивальд орлцв

“Голоса золотой степи”. Иим нерәдлһнә нарта-деклән дөрвдгч этнофестиваль Әәдрхн балһснд болв. Энүнд олн келн-улсин элчнр ирж орлцв. Хальмг танһчас фестивальд Гнесинихна нертә көгжмин Әрәсән академин оют Диана Босхомджиева билг-эрдмән үзүлв.

Диана Босхомджиеван келсәр, көгжм болн домбр угаһар бәәж чадшго. Бичкнәсн авн дуулдг болв. Күүкнә өрк-бүлнь үүдәгч әмтн. Эдн цугтан дуулад-биилнә. Келн-улсин билг-эрдмиг бичкн күүкнд энүнә ээжнь дасхв. Хамгин икәр Дианад хальмг айс таасгдна. Теднә негнь “Ялуха” дун. Эн дууг олн-зүсн марһаст оньдин дуулж өгдг бәәж. Эннь йоста харул-хааһул болгч көгжм болв. “Голоса золотой степи” фестивальд бас Ялуха ду дуулж өгв.

Дәкәд болхла Диана нарта-делкән марһанд “Сайг сәәхн саарл”, “Элиста дочь калмыцких степей” болн “Шавашмуд” олна оньгт тусхав. Төрскн һазртан, өөрхн улстан дурна учр-утхиг хәләһәчнрт күргж медүлж чадв. Иим фестивальмудт олн улсиг халмьгу лсин туужла болн сойлла таньдулх күцл Диана оньдин тәвж билг-эрдмән үзүлнә. Талдан келн-улсин авьяс-зангшалар бас соньмсна.

Диана Босхомджиеван келсәр, талдан келн-улсин билгтә көгмжчнриг сонсад, дамшлт авна. Иим марһан үүдәлтин халхар өслт өгнә. Өмнән күцл тәвәд марһанд орлцхла, эрдмин өслтд күрч болна.

Ке-сәәхн болн олн келн-улс орлцата фестиваль дөрв дәкж болжана. Нег сценд Әрәсән олн келн-улсин элчнр билг-әрдмән үзүлв. Хальмг танһчин билгтә күүкн хойрдгч девснгин лауреатын нер зүүв. Энүнә багш Алима Овьянован тоолврар, эн йир сән күцәмж болжана. Урднь Диана танһчин, цугәрәсән болн нарта-делкән марһаст диилвр бәрсмн.

Алима Овьянован келсәр, фестивалин программ йир соньн болв. Хәләһәчнриг соньмсулх төр тәвгдв. Диана иим даалһвриг күцәж чадв. Бидн цугтан сәәнәр дөрлдхәр зүткләвидн.

Удл уга Диана Монһлд одх зурата. Тенд билгтә күүкн мана өвкнрин уул сойлла, авьяс зангшалл өөрхн таньлдж чадх. Эврәннь көгмжин туужд шин халх секх арһ учрх.

Ээнән Делгр, Эрнжәнә Эрднь