Хальмгин бичкдүд Әрәсән хамцу хорин ханьд орв
Сурһульчнр амрлһна кемиг Санкт-Петербург балһснд давулв. “Алтн Булг” нертә негдгч тойгта искусствин школын хор нег минһн күн орлцата хамцу хорин ханьд Нева һол бәәх балһснд белдвр кев. Дәкәд нег тодлад келхлә, хамльгин бичкдүд Әрәсән хамцу хорин ханьд Сочи балһснд Олимпиадын хаалһна байрт товчлгч ду дуулх.
“Алтн Булг” коллективин ханьд олн бичкдүд оржана. Ут-тоодан һучн көвүн-күүкн бәәнә. Әрәсән нег минһн күн орлцата хорин ханьд орхин таалын зокалар регион болһнас арвн элч орх зөвтә. Эн керг-үүлдвр октябрин чилгчәр эклв. Тиигхд марһан зарлгдсн билә.Хальмг танһчд тавн коллектив марһанд дөрлдв. Аштнь негдгч тойгта искусствин кшолын бичкдүд диилвр бәрв. Энүнә ашт шүүврин хөөн арвн күн йилһж авгдв. Эдн Сочи балһснд болх Олимпиадт мана танһчас одх.
Негдгч тойгта искусствин школын “Алтн Булг” хорин һардач Наталья Дукманован келсәр, хорин ханьд орхин төлә енгсг сәәхн хоолта, ик коллективд дуулж чаддг, нотын медрл кергтә, зевсгүд угһар дуулж чаддг эрдм хамгин түрүнд кергтә болв. Эн кемжәһәр Әрәсән хорин ханьд бичкдүд шүүж авгдв. Иим ики чнртә кергт орлцсн бичкдүд икәр байрлв. Эннь йоста сән белг болв. Мариинск театрин сценд дуулх саам учрв, нертә дирижер Валерий Гергиевин һардврт эдн көдлв.
Хойр сар хооран хорин дуулх үүдәврмүдин даалһвр ирв. Тер цагас авн өдр болһн белдвр кегдв. Энүнд бичкдүд болн эднә эк-эцкнр орлцв. Наталья Дукманован келсәр, әрәсән хорин ниицән марһаг сән бүрдәмжтәһәр күцәжәнә. Бичкн дуучнрин төлә Санкт-петербург балһсна театрмудар болн туужлгч ормар экскурьс бүрдәгдв. Белдврин көдлмш болхла Мариинск театрин шин герт кегдв. Энүг нарта-делкәд нертә дирижер Валерий Гергиев һардв. Хорин ханьд дуулсн деерән бичкн артистнр эврә көгжмин номер үзүлв. Йирн күн орлцата Өмн үзгин федеральн округин хорла Кубанск хазгудын хорин һардач Виктор Захарченко көдлв. Эдн цугтан хазгудын “Да в саду дерево цветет” нертә ду дуулв.
Хорин бичкдүдлә Әрәсән Президент харһад күүндснь сән белг болв. Владимир Путин көвүд-күүкдин дуулсн ду сонсв. Олимпиад байрин бәәдлд хаалһна керг-үүлдврт дуулх ду бичкдүд Владимир Путинд дуулж өгв.
Эн күүкнә келсәр, белдвр кежәсн кемд Владимир Путин ирв. Концертд дуулх ду сонсв. Олимпийск ду бас сонсв. Иим ахр болзгт концертд белдснд Путин икәр өврв. Иим хорин ханьд орхин тускар санжасн уга. Санкт-петербург балһснд ирәд, талдан бичкдүд яһж дуулжахинь сонсв. Нег минһн күн дуулхла йир өвәрц болв гиэ эн күүкн келнә. Иим керг-үүлдврт орлцад, ик дамшлт хоршав. Нег үлү, нертә дирижер Валерий Гергиевин һардврт дуулхд хамгин сән белг болв гиж эн күүкн келв.
Февралин арвн һурвнд мана танһчин көвүд-күүкд Сочи балһснд һарч йовх. Эдн хөрн хойрдгч Олимпиад хаалһна байрт орлцх. Ода бичкн артистнр белдврин көдлмш кежәнә. Эдн йовх өдриг ик кезәнәс авн күләжәнә. Эднә нерд олимпиадын туужд орхнь лавта.
Батан Санжирма, Максим Мятежный
