Хальмг танһчд олимпийск һалын эстафетд орлцх

Иргч жилин январин хөрн тавнд Хальмг танһч “Сочи 2014” нертә олимпийск һалын эстафет тосж авх. Сочи балһснд болх үвлин олимпиад күртл зун найн өдр үлдв. Энүнә өмн октябрин доланд олимпийск һалын эстафет эклх. Нег өдрин эргцд олимпийск һал Элст балһснд ирхмн. Ода һалын бамбр авч йовх улсин зань тогтагдв. Теднә тоод мана танһчин нертә шатрч Динара Дорджиева бас эн тоод орв.

Элст балһсн нег өдртән Олимпийск һалын эстафетин хотл балһснд хүврх. Эн байрта йовдл иргч жилин январин хөрн тавнд учрх. Һал бамбр мана хотл балһснд төмр хаалһар ирх. Тегәд чигн Элстин төмр хаалһин вокзалд иим ик ичнртә йовдлд нерәдгдсн байрин керг-үүлдврмүд болх.

Олимпийск наадна бүрдәмжин комитетин президент Дмитрий Чернышенко келсәр, Сочи балһсна олимпиадын һалын эстафет ик дааврта чинр зүүжәнә. Иим кеәвр мана цуг орн-нутг негдәд, олн әмтн Әрәсән ке-сәәхнинь дәкнәс бийдән секх. Хальмгин хотл Элст балһснд һол байрин керг-үүлдвр цутхлнг талвнгд болхмн.

Танһчин спортын, туризмин болн баһчудын министрин дарук Константин Манджиевин келсәр, һал тосж авад, талвнгд углж тәвгдх ик ааһд һал шатх. Эн ааһ ода белн болв. Энүг Госстрах компань мана танчһд белглх.

Һал бамбр авч йовх улсин хань тогтагдв гиж танһчин спортын, туризмин болн баһчудын министрин дарук Константин Манджиев келж өгв. Мана танһчас арвн тавн күн энүг авч йовх зөв авв. Эднәс йсин күн Элст балһсар һал бамбр авч йовхмн, талдан әмтн Яшкульд йовх. Тегәд байрин керг-үүлдвр танһчин нег района цутхлнг селәнд бас болх. Энд болх цуг керг-үүлдврмүд минут болһнар бичж темдглгдв.

Танһчин спортын министрин дарук Константин Манджиевин келсәр, ода деерән әәмшг уга байр давулһна төрмүд хаһлгдв, рекламин, көлгн-күчнә төрмүд бас тоод авгдв. Цуг керг-үүлдврмүд минут болһнар темдглж авгдв.

Байрин керг-үүлдврин бүрдәһәчнрин келсәр, нег өдртән болх байр олимпиадын марһанла әдл ик чинртә болх. Эстафетын нег орлцач уйн наста шатрч Динара Дорджиева ик гидгәр байрлжана. Хөвтә күүкн гиж бийән тоолжана. Арвн тавн настадан ФИДЕ-н мастерин цол зүүв. Сурһульчнр дунд Әрәсән болн Европин чемпионатд диилвр бәрв. Арвн тавн наста күүкд дунд Әрәсән чемпиоантд цаһан мөнгн медаль шүүж авла. Ман танһчин шатрч Әрәсән арвн дөрвн минһн һал бамбр авч йовх улсин тоод орв.

Динара Дорджиеван келсәр, эннь ик чинртә байр болх. Эннь зуг энүнә байр биш, цуг орн-нтугин байр болжана. Хун хөрн йисн балһсн орлцх, цуг найн һурвн субьектд һал күрх.

Ода иим ик чинртә байрин керг-үүлдврт әрәсән улс белдвр эклв. Ода волонтермудын хань бүрдәгджәнә. Эднә күцәх үүлдврин зөрүлт темдглж авгдв. Хальмг танһчас олимпи адт зун найн күн көдлх. Танһчин спорытн министерствин көдләчнрин келсәр, эднә һардачнр йилһрв. Нурһлж эдн баһ наста улс. Болв эдн цугәрәсән болн нарта-делкән марһаст көдлсн билә.

Танһчин спортын, баһчудын болн туризмин министерствин специалист Эрдни Сангаджиевин келсәр, һурвн жил хооран волонтермудт иткл документ өггдлә. Эднә чинр иткүлжәх цаасн. Нидн жил бас иим керг күцәв. Хальмгин элч Китд болсн ик марһанд волонтер болж көдлв. Хөрн тавн күүнә тоод Әрәсән хамцу командын ханьд орад көдлсмн.

Һал бамбрин эстафет октябрин доланд экләд, олимпийск наадн эклсн өдр февралин доланд төгсх. Зун хөрн һурвн өдртән һал бамбриг әмтн автомобилря, поездар, самолетар, мөрн болн буһ Марлын цанар авч йовхмн. Ут-турштан Әрәсән найн һурвн субьектын хотл балһсар давж һарад, жирн тавн минһн дуунад йовх.

Чучян Валентина, Очра Сергей