Хаалһс мөств
Хальмг танһчд догшн киитнәс көлтә бачм чинртә бәәдл зардгдв. Энүнәс көлтә машид йовдг хаалһс болн әмтн йовдг хаалһ мөств. Хаалһс мөстснәс көлтә Элст балһсна хаалһст зеткртә йовдлмуд учрв. Хотл балһсна улс болхла хальтрата хаалһар йовхдан әәжәнә. Иим хаалһар йовхла шав авч болх.
Хальмг танһчин аһуд дегд ик киитн болснас көлтә бачм чинртә бәәдл тогтх гиж МЧС-ин көдләчнр саглулжана. Жолачнр болн йовһн улс хаалһсар болһамжтаһар йовхин тускар ГИБДД-н көдләчнр дуудвр кежәнә. Тер саамд Элст балһсна улсин келсәр, эн өдрмүдт хотл балһсна зәрм уульнцд элсн тас асхгджахш.
Эн күүкд күүнә келсәр, хаалһар йовж болжахш. Уульнцд элс асхгджахш. Эн медәтә күүнә келсәр, хаалһар йовхд дегд күнд. Нәәмдгч мсикрорайонд хаалһс энгдән мөстж. Йовхд дегд жанһрта болж одв. Эн күүкнә келсәр, залврин компаньс мууһар көдлжәнә. Зәрм хаалһст элсн асгджахш. Медәтә улст йовхд дегд күнд болжана.
ВЗК: Аһарин кемжән дегд икәр киитрснәс көлтә Элст балһсна зәрм хаалһсин участкст мөсн көрх гиж автоинспекцин көдләчнр темдглжәнә. Эн кемж маши залж йовх улс сагар йовж, ик болһамжтаһар машиһар йовх зөвтә. Машидын эздүдин келсәр, Элст балһснд зуг цутхлнг уульнцд хаалһс цевр. Талдан хотл балһсна райодт хаалһс икәр мөств.
Ода зуг Элст балһсна цутхлнг уульцнд хаалһс цевр. Хотл балһсна захд болхла хаалһс мөств. Гермүд хоорнд машид йовж чаджахш. Зәрм һазрт машиһар күрч болжахш. Энгдән мөсн көрч. Машиһар йовж болжахш.
Элст балһсна эдл-ахун һардачнрин келсәр, үвлин кем эклснәс авн хотл балһсна хаалһст өдр-сө уга бригадмуд көдлжәнә. Намрин-үвлин кемд тавн чинһн тонн элсн болн тавн зун тонн давсн белдж авгдв. Энүг негдүләд, хотл балһсна уульнцар асхжана.
Элст балһсна эдл-ахун директорин дарук Баснг Акиевин келсәр, ода аһарин кемжән дегд икәр киитрсн бийнь, хаалһсиг цеврләд, мөснәс цеврлж авч чадв. Ода хаалһар машид йовж чаджана. Цасн орхла машид йовдг хаалһс цеврлв. Ода хойр шин техник көдлжәнә. Цаглань хаалһс цеврлжәнә.
Элст балһсна эдл-ахун һардврин темдглсәр, магистральн уульнц цеврлһнә даалһвриг муниципалитет күцәх зөвтә. Ода хаалһин көдләчнрин дөрвн бригад өдр-сө уга көдлжәнә. Кемр тенгрин бәәдл муурхла болн бачм чинртә бәәдл тогтхла уульнцд арвн шишлнг техник һарч көдлх.
Элст балһсна эдл-ахун директорин дарук Баснг Акиевин келсәр, мана предпряитин медлд бәәх хаалһс цеврлжәнә. Гермүд хоорндк хаалһсиг залврин компаньсин көдләчнр цервлх зөвтә.
Предприять организацсин, хотл балһсна залврин компаньсин болн онц арһлачнрин медлд бәәх аһуд хаалһс мөстхлә, болн цасн икәр хурхла энүг эдн эврән һарч цеврлх зөвтә. Иим неквр эс күцәсн һардачнр административн ял өгх закан бәәнә.
Бевина Мергн, Очра Сергей
